بۇيرەك – اعزامىزدىڭ «ۇندەمەي» جۇمىس ىستەيتىن، ءبىراق ەڭ ماڭىزدى مۇشەلەرىنىڭ ءبىرى. ول قاندى سۇزەدى، ارتىق سۋدى، تۇزدى جانە زياندى زاتتاردى سىرتقا شىعارادى. سونىمەن قاتار قان قىسىمىن قالىپتى جاعدايدا ۇستاۋعا، سۇيەكتەردىڭ بەرىكتىگىن ساقتاۋعا، قان جاسۋشالارىن تۇزۋگە قاتىسادى.
كارديولوگيا جانە ىشكى اۋرۋلار عزي №2 تەراپيا بولىمشەسىنىڭ نەفرولوگ دارىگەرى قارماقباي سارسەنبايەۆتىڭ ايتۋىنشا، بۇيرەك سىرقاتى كوبىنە جاسىرىن باستالادى. دەگەنمەن مىناداي بەلگىلەردى ەسكەرۋسىز قالدىرۋعا بولمايدى:
– نەسەپ ءتۇسىنىڭ وزگەرۋى، كوپىرشىكتەنۋى نەمەسە قان ارالاسۋى؛
– بەت پەن اياقتاعى ءىسىنۋ؛
– قان قىسىمىنىڭ ءجيى كوتەرىلۋى.
ەگەر مۇنداي شاعىمدار بايقالسا، دارىگەرگە قارالىپ، قاراپايىم تەكسەرۋلەردەن (قان، نەسەپ تالداۋى، ۋدز) وتكەن ءجون.
بۇيرەك كوبىنە وزدىگىنەن ەمەس، باسقا دەرتتەردىڭ سالدارىنان زاقىمدانادى. ەڭ باستى سەبەپتەر مىنالار:
– قانت ديابەتى – قانداعى قانتتىڭ جوعارى بولۋى بۇيرەكتەگى ۇساق تامىرلاردى زاقىمداپ، سۇزگى قىزمەتىن السىرەتەدى. بۇل ديابەتتىك نەفروپاتياعا اكەلەدى؛
– جوعارى قان قىسىمى (گيپەرتونيا) – قان قىسىمى ۇزاق ۋاقىت بويى جوعارى بولسا، بۇيرەك تامىرلارى تارىلىپ، قىزمەتى بىرتىندەپ ناشارلايدى؛
– جۇقپالى اۋرۋلار – انگينادان كەيىنگى گلومەرۋلونەفريت، ءزار شىعارۋ جولدارىنىڭ قابىنۋى بۇيرەكتى زاقىمدايدى؛
– تۇقىم قۋالايتىن دەرتتەر – پوليكيستوزدى بۇيرەك سياقتى اۋرۋلار تۇقىم ارقىلى بەرىلەدى؛
– ۋىتتى اسەرلەر – كەيبىر دارىلەردى (اۋىرسىنۋدى باساتىن، انتيبيوتيكتەردى) ۇزاق ۋاقىت باقىلاۋسىز قابىلداۋ، الكوگول مەن ۋلى زاتتار بۇيرەككە زيان؛
– يممۋندىق جۇيە اۋرۋلارى – جۇيەلى قىزىل جەگى، ۆاسكۋليت سياقتى سىرقاتتار دا بۇيرەكتى زاقىمدايدى.
بۇيرەك اۋرۋلارىنىڭ الدىن الۋ ءۇشىن قاراپايىم ەرەجەلەردى ساقتاۋ قاجەت:
• قان قىسىمىن تۇراقتى باقىلاۋ؛
• قانت ديابەتى بار بولسا، ەمدى ۇزبەۋ جانە قانت دەڭگەيىن قاداعالاۋ؛
• ينفەكسيالاردى اسقىندىرماي، دەر كەزىندە ەمدەۋ؛
• تۇزدى شەكتەپ، دۇرىس تاماقتانۋ؛
• ءدارىنى ءوز بەتىمەن ەمەس، دارىگەر كەڭەسىمەن قابىلداۋ؛
• جىلىنا كەمىندە ءبىر رەت جالپى تەكسەرۋدەن ءوتۋ.
"ءيا، بۇيرەك – ءۇنسىز قىزمەت ەتەتىن قورعاۋشىمىز. ونىڭ «ۇندەمەي» جۇرگەنى – ساۋ ەكەنىن بىلدىرەدى، ءبىراق بۇل بەيقام بولۋعا سەبەپ ەمەس. ءاربىر ادام دەنساۋلىعىنا جاۋاپتى. بۇيرەككە كۇتىم جاساۋ – ۇزاق عۇمىردىڭ كەپىلى"، – دەيدى كارديولوگيا جانە ىشكى اۋرۋلار عزي №2 تەراپيا بولىمشەسىنىڭ نەفرولوگ دارىگەرى قارماقباي سارسەنبايەۆ.