الماتىداعى قۇلجا تراكتىندەگى جاڭا جولايرىعى اۆتوكولىكتىڭ ءوتۋ قابىلەتىن 5 ەسەگە ارتتىرادى
الماتىدا بۋحتارمينسكايا كوشەسى مەن قۇلجا تراكتىسى قيلىسىنداعى جولايرىعى بويىنشا 4 جولاقتى قوزعالىسى بار بۋحتارمينسكايا كوشەسىنىڭ توننەلدى بولىگى اشىلدى. جوبا بۇحتارمينسكايا كوشەسى بويىمەن اۆتوكولىكتىڭ ءوتۋ قابىلەتىن 15% - عا، قۇلجا تراكتىسى بويىنشا 20% - عا ارتتىرۋعا مۇمكىندىك بەرەدى. بۋحتارمينسكايا كوشەسى ۋچاسكەسىنىڭ جالپى قۇرىلىس ۇزىندىعى 830 م، ونىڭ ىشىندە توننەل بولىگىنىڭ ۇزىندىعى – 149.
الماتى اكىمدىگىنىڭ تاپسىرىسى بويىنشا كولىك جۇكتەمەسىن تومەندەتۋ، كولىك قىزمەتىنىڭ ساپاسىن ارتتىرۋ ماقساتىندا الماتى قالاسىنىڭ سولتۇستىك-شىعىس بولىگىنىڭ جۇكتەلگەن كولىك توراپتارىنىڭ ءتيىمدى جۇمىس ىستەۋىن قامتاماسىز ەتە وتىرىپ، 2018 جىلى بۋحتارمينسكايا كوشەسى مەن قۇلجا تراكتىسى قيىلىسىندا جولايرىعىن سالۋ جوباسى ازىرلەندى، ال 2019 جىلى قۇرىلىس-مونتاج جۇمىستارى باستالدى.
«توننەل اشىلعاننان كەيىن جولايرىعىنىڭ اينالما بولىگىندەگى جۇكتەمە ازايادى. بۇگىندە توننەل بولىگى اشىلعانعا دەيىن بارلىق كولىكتەر اينالما ارقىلى مانيەۆر جاسادى، مۇندا جۇكتەمە كوبەيىپ، ۇلكەن كەپتەلىس پايدا بولدى. سوندىقتان 2018 جىلى وسى جولايرىعىن سالۋ جانە قۇلجا تراكتىسى، بۋحتارمينسكايا كوشەسى ارقىلى ءوتۋدى قامتاماسىز ەتۋ جانە اۋەجايعا قاراي كولىك قوزعالىسىن جەڭىلدەتۋ قاجەتتىلىگى تۋرالى شەشىم قابىلداندى»، - دەپ اتاپ ءوتتى الماتىنىڭ قالالىق موبيلدىلىك باسقارماسىنىڭ باسشىسى ساعىندىق تەلىبايەۆ.
كولىك تورابى - بۇل بىرنەشە جاساندى قۇرىلىمداردىڭ جيىنتىعى، ولار: بۋحتارمينسكايا كوشەسىندەگى توننەل، تىرەۋ قابىرعالار، تىرەۋ قابىرعالارى بار ەستاكادالار، سونداي-اق نولدىك دەڭگەيدەگى اينالما جولدار جانە بارلىق باعىتتارداعى وڭ جاق سەزدەر. ەكى نەگىزگى باعىتتاعى جول جۇكتەمەسىن تومەندەتۋ كۇتىلۋدە، ولار: حالىقارالىق اۋەجايدان الماتى قالاسىنا جانە قالادان تالعار مەن الاتاۋ سىندى ەلدى مەكەندەرگە قاتىنايتىن كولىك قوزعالىسى. قاربالاس ۋاقىتتا بۇل باعىتتاردىڭ جۇكتەمەسى وتە جوعارى، سونىڭ سالدارىنان ۇلكەن كەپتەلىستەر تۋىندايدى.
«تۇركسىب اۋدانىنداعى جولايرىعىن سالۋ جونىندەگى ءىرى ينفراقۇرىلىمدىق جوبا 31 قازانعا دەيىن تولىق اياقتالادى. بۇگىندە سۋ قۇبىرى جەلىلەرىن اباتتاندىرۋ جانە قايتا قۇرۋ جۇمىستارى جۇرگىزىلۋدە. توراپتىڭ وتكىزۋ قابىلەتى 5 ەسەگە جۋىق وسەدى، ونى تاۋلىگىنە 340 مىڭعا دەيىن اۆتوموبيل پايدالانا الادى»، - دەدى «Bazis Construction» ج ش س مەردىگەر-كومپانياسىنىڭ وكىلى جانە وبەكتىنىڭ باسقارۋشى ديرەكتورى فاريز تۋتادزە.
بۇگىندە وسى جوبا اياسىندا قۇلجا تراكتىسى بويىنشا ەستاكادانىڭ ارالىق قۇرىلىسىن، بۋحتارمينسكايا كوشەسىندەگى توننەل بولىكتى، سەزدەر مەن تۇيىسپەلەردى سالۋ بويىنشا جۇمىستار اياقتالدى، ال بۇل كولىك تورابىنىڭ وتكىزۋ قابىلەتىن بەس ەسەگە ارتتىرادى. سونداي-اق، سۋ قۇبىرى جەلىلەرىن اباتتاندىرۋ جانە قايتا قۇرۋ جۇمىستارى جۇرگىزىلۋدە. جوباعا سايكەس، اباتتاندىرۋدى ەسكەرە وتىرىپ، وسى كولىك ايرىعىنىڭ قۇرىلىسىن تولىق اياقتاۋ اعىمداعى جىلدىڭ قازان ايىنىڭ سوڭىنا جوسپارلانعان.
ايتا كەتەرلىگى، الماتىدا بۇگىندە ءۇش جولايرىعى سالىنۋدا، ولار: سەيفۋللين داڭعىلى – جانسۇگىروۆ كوشەسى (اياقتالۋ مەرزىمى - 2024 جىلدىڭ سوڭى)، ساين كوشەسى - موڭكە بي كوشەسى (مونكە بي كوشەسى بويىنشا قوزعالىس 2023 جىلدىڭ سوڭىنا دەيىن اشىلادى، نىساننىڭ اياقتالۋ مەرزىمى – 2024 جىلدىڭ ەكىنشى توقسانى) جانە بۋحتارمينسكايا كوشەسى - قۇلجا تراكتىسى (قوزعالىس تولىعىمەن اشىق، اباتتاندىرۋ جۇمىستارى قازان ايىنىڭ سوڭىنا دەيىن اياقتالادى). ولاردىڭ بارلىعى الماتىدا كولىك اعىندارىنىڭ جۇكتەمەسىن ازايتۋعا ىقپال ەتەدى.
