بۇگىننەن باستاپ ساقتاندىرۋ ماسەلەلەرى بويىنشا كونسۋلتاسيا بەرىلەدى

كەڭەس 1414 بايلانىس ورتالىعى ارقىلى بەرىلمەك.

قازاقستاندىقتار بۇگىننەن باستاپ مەديسينالىق ساقتاندىرۋ جانە مەدقىزمەتكە قاتىستى كونسۋلتاسيالاردى 1414 ءبىرىڭعاي بايلانىس ورتالىعى ارقىلى الا الادى، دەپ حابارلايدى Almaty-akshamy.kz

بۇعان دەيىن بۇل قىزمەتتى مەديسينالىق ساقتاندىرۋ قورى جانىنداعى 1406 بايلانىس ورتالىعى اتقارىپ كەلگەن بولاتىن.

مسق الماتى قالالىق فيليالى ديرەكتورى تىلەۋحان ابىلدايەۆتىڭ ايتۋىنشا، بۇل شارا حالىققا قىزمەت كورسەتۋ اياسىن كەڭەيتىپ، وپەراتور ازدىعىنان جاۋاپ بەرىلمەي قالعان قوڭىراۋلار سانىن قىسقارتۋ ماقساتىندا قولعا الىنىپ وتىر.

«بۇعان دەيىن تۇرعىندار 1406 نومىرىنە حابارلاسىپ، مەديسينالىق ساقتاندىرۋ، دەنساۋلىق ساقتاۋعا قاتىستى تەگىن كونسۋلتاسيا الا الاتىن. سونىمەن قاتار، مەديسينالىق كومەك ساپاسىنا قاتىستى ءوتىنىش-شاعىمدار دا وسى بايلانىس ارناسى ارقىلى قابىلدانىپ كەلدى. 1-ماۋسىمنان باستاپ بۇل قىزمەتتى 1414 بايلانىس ورتالىعى كورسەتە باستايدى. سەبەبى ونداعى وپەراتورلار شتاتى ۇلكەن جانە ورتالىقتىڭ تەحنيكالىق مۇمكىندىكتەرى جوعارى. ورتالىقتىڭ ءبىر ۋاقىتتا كوپتەگەن قوڭىراۋلاردى قابىلداۋعا مۇمكىندىگى بار. بۇل ءوز كەزەگىندە ابونەنتتەردىڭ وپەراتور جاۋابىن كۇتۋگە كەتەتىن ۋاقىتىن بىرنەشە مينۋتتان ءبىر مينۋتقا دەيىن قىسقارتۋعا مۇمكىندىك بەرەدى»، - دەدى تىلەۋحان ابىلدايەۆ.

وتىنىشتەردى بۇرىنعىشا قوردىڭ Qoldau 24/7 ءموبيلدى قوسىمشاسى، Telegram-بوت (@SaqtandyrýBot) پەن رەسمي ۆەب-سايتى ارقىلى دا جولداۋعا بولادى.

ءبىر ايتا كەتەرلىگى، 1414 وپەراتورلارى كۇن سايىن ساعات 9.00-دەن 20.00-گە دەيىن جۇمىس ىستەيدى.