ۇلى جازۋشى مۇحتار اۋەزوۆتىڭ تۋعانىنا - 125 جىل
اۋديوكىتاپ فورماتىنداعى حابار ناۋرىز ايىندا باستالىپ، قىركۇيەك ايىنا دەيىن جالعاسادى، دەپ حابارلايدى Almaty-akshamy.kz قازاقپاراتقا سىلتەمە جاساپ.
بۇل تۋرالى «قازاق راديولارى» ج ش س باس رەداكتورى - «قازاق راديوسى» راديوارناسىنىڭ ديرەكتورى دۋلات ابيبۋللايەۆ facebook جەلىسىندەگى پاراقشاسىندا جازدى.
«ۇلى پروزايك مۇحتار اۋەزوۆتىڭ دۇنيەگە كەلگەنىنە بيىل 125 جىل. وسىعان وراي تىڭداۋشىلارعا 2 ناۋرىزدان باستاپ «اباي جولى» رومان-ەپوپەياسىن ۇسىنامىز. «كوكجيەك» حابارى اپتاسىنا 7 كۇن، ساعات 21.00 دە ەفيرگە شىعادى. كىتاپتى قازاق راديوسىنىڭ بەلگىلى ديكتورى امانجان سەرىكوۆ دىبىستاعان»، - دەپ اتاپ وتكەن راديوارنا باسشىسى ءوز جازباسىندا.
«اباي جولى» ەپوپەياسى مۇحتار اۋەزوۆتىڭ الەمگە ايگىلى تاريحي روماندار توپتاماسى، قازاق حالقىنىڭ تۇڭعىش ەپوپەياسى. ول 1942 جىل مەن 1956 جىلدار ارالىعىندا جازىلىپ، جارىققا شىقتى.
ەپوپەيانىڭ «اباي» اتانعان العاشقى ەكى كىتابىنا كسرو مەملەكەتتىك سىيلىعى (1949)، «اباي جولىنىڭ» تۇتاس ءتورت تومىنا لەنيندىك سىيلىق (1959) بەرىلگەن.
ايتا كەتۋ كەرەك، بۇعان دەيىن قازاق راديوسىنىڭ ەفيرىنەن تاۋەلسىزدىكتىڭ 30 جىلدىعىنا وراي ءىلياس ەسەنبەرليننىڭ «كوشپەندىلەر» تريلوگياسىنىڭ اۋديونۇسقاسى، سونداي-اق، تاحاۋي احتانوۆتىڭ «بوران»، حامزا ەسەنجانوۆتىڭ «اقجايىق»، جازۋشى ءازىلحان نۇرشايىقوۆتىڭ «ماحاببات، قىزىق مول جىلدار» روماندارى مەن پرەزيدەنت وقۋعا ۇسىنعان كىتاپتار تىزىمىندەگى جۇسىپبەك ايماۋىتوۆتىڭ «اق بىلەك»، ءابىش كەكىلبايەۆتىڭ «ۇركەر»، قاليحان ىسقاقتىڭ «قوڭىر كۇز ەدى»، ساكەن ءجۇنىسوۆتىڭ «اقان سەرى»، بەردىبەك سوقپاقبايەۆتىڭ «مەنىڭ اتىم قوجا»، ءسابيت مۇقانوۆتىڭ «بالۋان شولاق»، شەرحان مۇرتازانىڭ «بەسەۋدىڭ حاتى»، مۇحتار ءماعاۋيننىڭ «ءبىر اتانىڭ بالالارى» ەڭبەكتەرى مەن ت.ءالىمقۇلوۆتىڭ اڭگىمەلەرى دە اۋديوكىتاپ فورماتىندا اۋە تولقىنىنان بەرىلگەن.