بۇل تۋرالى باقىتجان ساعىنتايەۆتىڭ توراعالىعىمەن وتكەن الماتىنىڭ تىنىس-تىرشىلىگىن قالپىنا كەلتىرۋ جونىندەگى قالالىق شتاب وتىرىسىندا اكىمنىڭ ورىنباسارى ءىلياس وسەروۆ مالىمدەدى، دەپ حابارلايدى اlmaty-akshamy.kz.
اڭگىمە مەملەكەتتىك ورگانداردىڭ، اۋرۋحانالار مەن باق-تىڭ زارداپ شەككەن 603 قىزمەتكەرىنە وتەماقى تولەمدەرى تۋرالى بولىپ وتىر. ونىڭ ىشىندە: 592 قۇقىق قورعاۋ ورگاندارىنىڭ قىزمەتكەرى، توتەنشە جاعدايلار دەپارتامەنتىنىڭ 1 قىزمەتكەرى، جەرگىلىكتى اتقارۋشى ورگانداردىڭ 3 قىزمەتكەرى، «الماتى» تەلەارناسىنىڭ 1 قىزمەتكەرى جانە مەديسينالىق ۇيىمداردىڭ 6 قىزمەتكەرى.
ءىلياس وسەروۆتىڭ ايتۋىنشا، تولەمدەر اۋىر دارەجەدە زارداپ شەككەندەرگە 2 ملن تەڭگە، ورتاشا دارەجەدە – 1 ملن تەڭگە، جەڭىل تۇردە – 500 مىڭ تەڭگە ەسەبىنەن جۇرگىزىلەدى.
سونىمەن قاتار، تج كەزىندە جۇمىلدىرىلعان پوليسيا دەپارتامەنتىنىڭ 3878 قىزمەتكەرىنە، توتەنشە جاعدايلار دەپارتامەنتىنىڭ 1207 قىزمەتكەرىنە، قوعامدىق دەنساۋلىق باسقارماسىنىڭ 3888 قىزمەتكەرىنە، قۇتقارۋ قىزمەتىنىڭ 93 قىزمەتكەرىنە 100 مىڭ تەڭگە كولەمىندە قارجىلاي كومەك تولەنەدى.
«بۇگىن ءتيىستى قۇجاتتار قازىناشىلىققا جىبەرىلىپ، تۇستەن كەيىن العاشقى تولەمدەر جاسالادى»، - دەپ اتاپ ءوتتى الماتى اكىمىنىڭ ورىنباسارى.
پوليسيا دەپارتامەنتىنە ءتيىستى تەرگەۋ ارەكەتتەرى اياقتالعاننان كەيىن زارداپ شەككەن اۆتوكولىكتەرگە تولەمدەردى قامتاماسىز ەتۋ ءۇشىن شامامەن 200 ملن تەڭگە مولشەرىندە باستاپقى سوما جىبەرىلەتىن بولادى. قاجەت بولعان جاعدايدا بۇل سوما كوبەيتىلەدى.