قاراعاندىدا سايلاۋ ۋچاسكەسىندە وبلىستىق، قالالىق جانە اۋداندىق ءماسليحاتتاردىڭ دەپۋتاتتارى جينالادى. وڭىردە بارلىعى 14 ءماسليحات پەن 204 دەپۋتات بار، دەپ حابارلايدى قازاقپارات ءتىلشىسى.
قاراعاندى وبلىسىندا سەناتور مانداتىنا ءۇش ادام ۇمىتكەر. پارلامەنتتىڭ جوعارعى پالاتاسىنا سايلاۋ قاراعاندى كەنشىلەر مادەنيەت سارايىنىڭ عيماراتىندا وتەدى. داۋىس بەرۋگە وبلىس ءماسليحاتتارىنىڭ بارلىق دەڭگەيدەگى سايلاۋشىلارى-دەپۋتاتتارى جينالدى.
قاراعاندى وبلىسىندا سەنات دەپۋتاتتىعىنا جەتى كانديدات ۇسىنىلدى. ءۇش كانديدات تىركەلگەن.
«بۇگىنگى تاڭدا ءوڭىر بويىنشا وبلىس ءماسليحاتتارىنان 204 سايلاۋشى دەپۋتات تىركەلگەن. قاراعاندى وبلىسىندا 14 ءماسليحات بار. بۇگىندە ولاردىڭ وكىلدەرى داۋىس بەرۋ قۇقىعىنا يە. قازىرگى ۋاقىتتا دەپۋتاتتاردى تىركەۋ ءراسىمى ءجۇرىپ جاتىر. ەلەكتروندىق تىركەۋ تەكسەرىلىپ، ساعات 11.00-دە داۋىس بەرۋ ءراسىمى باستالادى. داۋىس بەرۋ قورىتىندىسى بويىنشا حاتتاما جاسالادى. سايلاۋ قورىتىندىسىن وسك ءبىر اپتا ىشىندە جاريالايدى. بەلگىلى ءبىر سەبەپتەرمەن داۋىس بەرۋگە قاتىسا الماعان دەپۋتاتتارعا كەلەتىن بولساق، الدىن الا ەسكەرتۋ بويىنشا ارنايى ەرەجەلەر جوق. ءبىز بارلىق دەپۋتاتتاردى سايلاۋ وتەتىن ورنى مەن ۋاقىتى بويىنشا ۋاقتىلى حاباردار ەتتىك. ءبىراق ءتۇرلى سەبەپتەر بولۋى مۇمكىن. زاڭ بويىنشا بۇل ولاردىڭ قۇقىعى، ءبىراق مىندەتى ەمەس»، - دەدى قاراعاندى وبلىستىق سايلاۋ كوميسسياسىنىڭ ءتوراعاسى قايرات نۇركەنوۆ.
ەستەرىڭىزگە سالا كەتەيىك، مەملەكەت باسشىسىنىڭ جارلىعىمەن ق ر پارلامەنتى سەناتىنىڭ دەپۋتاتتارىن سايلاۋ 2023 جىلعى 14 قاڭتارعا تاعايىندالدى.
سەناتتى قالىپتاستىرۋ ءتارتىبى ق ر كونستيتۋسياسىندا ايقىندالعان. پارلامەنتتىڭ جوعارعى پالاتاسىندا ءار وبلىستان، رەسپۋبليكالىق ماڭىزى بار قالادان جانە استانادان ەكى ادام ۇسىنىلعان. سەنات دەپۋتاتتارى جاناما سايلاۋ قۇقىعى نەگىزىندە سايلاۋشىلار – ءماسليحات دەپۋتاتتارى جاسىرىن داۋىس بەرگەن كەزدە سايلانادى. سەنات دەپۋتاتتارىنىڭ وكىلەتتىك مەرزىمى التى جىلدى قۇرايدى. بۇل جاعدايدا جارتىسى ءۇش جىل سايىن قايتا سايلانادى.