بۇگىن - انالار كۇنى. الەمنىڭ 20-دان اسا مەملەكەتى اتاۋلى كۇندى مامىردىڭ ەكىنشى جەكسەنبىسىندە اتاپ وتەدى.
بۇل مەرەكە بيىل قازاقستاندا العاش رەت تويلانعالى وتىر. بۇگىندە ەلىمىزدە ەرەكشە بالا تاربيەلەپ وتىرعان جىگەرلى انالار دا جەتەرلىك، دەپ حابارلايدى Almaty-akshamy.kz.
گۇلسىم تولەگەنوۆا 12 جىلدان بەرى ەرەكشە بالا تاربيەلەپ وتىرعان انا. ۇلى ءعازيزدىڭ ءار قادامىن باقىلاۋدا ۇستاپ، ەم-دومىن تۇراقتى جاساپ كەلەدى. ءۇمىتىن ەش ۇزبەگەن قايسار انا بالاسىنىڭ ساۋىعىپ كەتەتىنىنە دە سەنىمدى.
گۇلسىم تولەگەنوۆا، قالا تۇرعىنى:
2011 جىلعا دەيىنگى ءومىرىم باسقا، ودان كەيىنگى ءومىرىم بالانى دامىتۋ. ءبىراق جۇمىسىمىزدى تاستاعان جوقپىز. اپتەكامىز بولدى جۇمىس ىستەپ جاتىرمىز. جولدامىسىز ەكەۋىمىز گرافيك قويدىق. ءبىز تيۋتر، قىزمەتشى دەگەندەردى جالدامادىق. ونى المادىق. سەبەبى، بالامىزدى ءوزىمىز قاراۋ كەرەك بولدىق.
بۇگىندە ءعازيزدىڭ جەتكەن جەتىستىگى كوپ. بوچچادان حالىقارالىق جارىستاردا توپ جارىپ، ۇزدىكتەردىڭ قاتارىنان تابىلىپ ءجۇر. ال اناسى مۇمكىندىگى شەكتەۋلى بالانى تاربيەلەۋدى وزىنە ەرەكشە پارىز سانايدى.
گۇلسىم تولەگەنوۆا، قالا تۇرعىنى:
ۋاقىتتى جوعالتپاي، ەرەكشە بالا كەلدى مە؟! ونى قابىلداپ، بارلىق انالىق ماحابباتىڭدى بەرىپ تەز تۇرعىزىپ جىبەرسەڭ، رەابيليتاسياعا اپارىپ بارلىق ماحابباتىڭدى توكسەڭ بالا دەگەن تەز تۇرىپ كەتەدى.
ال گۇلنار يۋلداشيەۆا انا مەن ەرەكشە بالا مەيىرىمگە مۇقتاج دەيدى. سوندىقتان ەلىمىزدە ينكليۋزيۆتى قوعام ورناتۋدى جەتىلدىرۋ كەرەكتىگىن ايتتى.
گۇلنار يۋلداشيەۆا، قالا تۇرعىنى:
ەڭ العاش بالامنىڭ دياگنوزىن ەستىگەندە قيىن بولدى. ءبىراق بالادان باس تارتۋ دەگەن ويىما دا كىرىپ شىقپاپتى. ءقازىر ونداي اتا-انالار كوپ. سوندىقتان ولارعا جان-جاعىنداعى ادامداردىڭ قولداۋى اۋاداي قاجەت. قارجىلاي ەمەس. ءبىر اۋىز جىلى ءسوزدىڭ ءوزى انا مەن بالا اراسىندا ماحابباتتى كۇشەيتەدى. مەن سونىڭ ارقاسىندا ەرەكشە بالامدى اياققا تۇرعىزدىم.
ەرەكشە بالا تاربيەلەپ وتىرعان انالار بۇگىنگى اتاۋلى كۇننىڭ مارتەبەسىن ءالى دە نىعايتۋ كەرەك دەپ ەسەپتەيدى. سوندا عانا ايەل انا بولۋدىڭ ماڭىزدىلىعىن ءتۇسىنىپ، قوعام ولاردى تولىق قورعاۋعا الاتىنىن ايتتى.