بۇگىن – ۇلتتىق كيىم كۇنى

بيىلدان باستاپ 14-23 ناۋرىز ارالىعىندا حالىقتىق مەرەكەنى تويلاۋعا ارنالعان ناۋرىزناما ونكۇندىگى جاريالاندى.

ونكۇندىكتىڭ بەسىنشى كۇنى ۇلتتىق كيىمگە ارنالدى، دەپ حابارلايدى Almaty-akshamy.kz

وسى 10 كۇندە قازاقستان اۋماعىندا 400-گە جۋىق ءىس-شارا وتەدى دەپ جوسپارلانعان.

ۇلتتىق كيىمگە ارنالعان بۇل كۇن اتا-بابامىزدى، ۇرپاقتان-ۇرپاققا جالعاسىپ كەلە جاتقان ادەت-عۇرىپتاردى ەسكە الاتىن ەرەكشە كەزەڭگە اينالادى. بۇل – حالىق رۋحىنىڭ شاعىلىسىن بەينەلەيتىن ۇلتتىق ديزايننىڭ كوركەمدىگى مەن قايتالانباس ورنەگىنە تامسانىپ، بۇل ونەردەگى باي مۇرانى زەرتتەپ، ودان شابىت الاتىن كۇن.

عاسىرلار بويى قازاقتىڭ ۇلتتىق كيىمى قاراپايىمدىلىعىمەن جانە ۇتىمدىلىعىمەن ەرەكشەلەنىپ كەلدى، ءتىپتى زاماناۋي ءسان تالعامى دا ونىڭ ماڭىزىن كەمىتە الماق ەمەس. ۇلتتىق كيىم ۇلگىسىندە پايدالانىلاتىن بىلعارى، ءجۇن، كيىز، ماتا سياقتى تابيعي ماتەريالدار ادامعا جىلۋلىق پەن جايلىلىق سىيلاۋمەن قاتار، كيىم يەسىنىڭ اتاق-دارەجەسىن، بايلىعىن كورسەتەتىن. 

قازىرگى مودەرنيزاسيا داۋىرىندە ۇلتتىق كيىمنىڭ ءمانى جاڭا سيپات الدى: بۇرىنعى داستۇرلەر مەن قازىرگى ۇردىستەردى بىرىكتىرە وتىرىپ، جاڭا ينتەرپرەتاسياعا يە بولدى. 

قازىرگى زامانعى ۇلتتىق كيىم ۇلتتىق مىنەز پەن ۇلت بىرلىگىن ايشىقتاي وتىرىپ، ەل مادەنيەتى مەن تاريحىنىڭ اجىراماس بولىگىنە اينالدى.