بۇگىن تۇندە ماگنيتتىك داۋىل بولادى

جەردەگى ماگنيتتىك داۋىلدار قازاننىڭ 3 كۇنى باستالعان بولاتىن. 

ماماندار 16 قازانعا قاراعان ءتۇنى، ياعني بۇگىن ماگنيت داۋىلى بولادى دەگەن بولجام بار، دەپ حابارلايدى aqshamnews.kz

ربك باسىلىمىنىڭ جازۋىنشا، رەسەي عىلىم اكادەمياسى عارىشتىق زەرتتەۋلەر ينستيتۋتىنىڭ كۇن استرونومياسى زەرتحاناسى ماگنيت داۋىلى سارسەنبىگە قاراعان ءتۇنى، ءتۇن ورتاسىندا باستالىپ، تاڭعى ساعات 6 شاماسىندا باسىلاتىنىن مالىمدەگەن.

داۋىل G1 دەڭگەيىندە ءالسىز بولادى. ونىڭ بولجامدى ىقتيمالدىعى 40%-عا تەڭ.

جەردەگى ماگنيتتىك داۋىلدار قازاننىڭ 3 كۇنى باستالعان بولاتىن. ول اپتانىڭ سوڭىنا دەيىن جالعاستى. ەكىنشىسى 2 قازان كۇنى بولدى. مامانداردىڭ ايتۋىنشا، بۇل 2024 جىلعى ەكىنشى قۋاتتى ماگنيت داۋىلى بولدى. كەيىن ماماندار 10 قازان كۇنى كۇشتى ماگنيت داۋىلى بولادى دەپ بولجادى. بولجام ءدال كەلىپ، ونىڭ دەڭگەيى G4-كە جەتتى. قۋاتتى داۋىل ءبىر تاۋلىككە دەيىن سوزىلىپ، 11 قازان كۇنى باسىلدى.

ماگنيت داۋىلدارى ەلەكتروندى اپپاراتتارعا، اسىرەسە، عارىش ستانساسىنداعى سپۋتنيكتەرگە، تەحنيكالىق قۇرال-جابدىقتارعا اسەر ەتەدى. بۇل عارىشتىق جەلدىڭ يونداۋشى ساۋلەلەنۋ اعىندارىن اكەلۋىنە بايلانىستى.