دجينسى العاشىندا جۇمىسشىلار ءۇشىن تىگىلگەن ەكەن. ءيا، شالباردىڭ دا «تۋعان» كۇنى بار. ياعني، 20 مامىر – حالىقارالىق دجينسى كۇنى. بۇل كۇندى الەمدە ارنايى، رەسمي تۇردە اتاپ وتەتىن مەملەكەت جەتىپ ارتىلادى. دۇرىس تا شىعار. ياعني بىزگە ءسان بەرىپ تۇرعان دجينسى دا بىرەۋدىڭ وي-قيالى، يدەياسىنان تۋىنداعان.
توزبايتىن كەنەپ
بۇگىنگى كۇنى كەز-كەلگەن ءۇيدىڭ گاردەروبىنان تابىلاتىن دجينسىدى العاش رەت 1850 جىلى امەريكالىق كاسىپكەر ليۆاي ستراۋسس التىن ىزدەۋشى ءبىر اۋقاتتى كىسىنىڭ تاپسىرىسىمەن ويلاپ تاپقان ەكەن. بۇل كيىم تاۋ-تاستى كەزەتىن، وت-سۋدى كەشەتىن ادامعا قولايلى بولۋى، تەز جىرتىلىپ، توزىپ قالماس ءۇشىن العاشىندا كەنەپتەن، ەكى قاتار تىگىسپەن تىگىلەدى. جانە ءتۇرلى قۇرال-سايماندار سالىپ جۇرۋگە قولايلى بولۋ ءۇشىن ونىڭ قالتاسى دا كوپ بولادى. ونى ليۆاي تاپسىرىس بەرۋشىگە 1 دوللار 46 سەنتكە ساتادى.
بەرتىن كەلە دجينسى جۇمىسشىلاردىڭ، تەڭىزشىلەردىڭ، قاراپايىم شارۋالاردىڭ ۇستىنەن تاستاماي كيەتىن كيىمىنە اينالىپ شىعا كەلەدى. ليۆاي ستراۋسس ونەرتابىسىن 1853 جىلدىڭ 20 مامىرىندا پاتەنتتەپ الادى. ارادا از ۋاقىت وتپەستەن ول سان-فرانسيسكودا جۇمىس كيىمدەرىن تىگۋ ءۇشىن «Levi Strauss & Co» فيرماسىن ۇيىمداستىردى. ءسويتىپ كوپ قالتالى، بەرىك دجينسى شالبارىن ءوندىرۋدىڭ جالعىز قۇقىعىنا يە بولادى، ياعني ليسەنزيا بەرىلەدى. دجينسى شىعاراتىن ايگىلى «Levi's» برەندى وسىلاي پايدا بولعان.
ايەلدەر كيمەيدى
«Levi's» 1981 جىلى العاش رەت ايەلدەرگە ارنالعان دجينسى شىعاردى.
يندونەزيانىڭ كەيبىر پروۆينسيالارىندا ايەلدەرگە دجينسى كيۋگە تىيىم سالىنعان. ول جاقتا قىز-كەلىنشەكتەرگە ارنالعان دجينسى ساتپايدى.
دجينسى وندىرۋشىلەر ولاردى تىگۋگە جانە ارلەيتىن تاستارى ءۇشىن جىلىنا 2 ميلليون اقش دوللارىن جۇمسايدى. 2009 جىلى «Levi Strauss & Co» فيرماسى قالتاسىندا قۇلاققا قىستىراتىنى، كومپيۋتەرگە جالعاعىشى قوسا تىگىلگەن دجينسى شالبارلار ويلاپ تاپتى. ال بۇگىندە دجينسى نارىعىن «Calvin Klein»، «Diesel»، «Gap»، «Guess»، «Mustang»، «Polo»، «Tommy hilfinger»، «Zara» سياقتى كومپانيالار دا جاۋلاپ العان.
گاۋھارمەن ارلەنگەن
الەمدەگى ەڭ قىمبات دجينسى «Secret Circus» برەندىنىڭ مودەلى. ول اۋكسيوندا 1،3 ميلليون اقش دوللارىنا ساتىلعان. وسىنشالىقتى اسپانداعان باعاعا ساتىلعان سەبەبى، شالباردىڭ ارتقى وڭ قالتاسى 15 گاۋھار تاسپەن ارلەنگەن كورىنەدى.
دەگەنمەن دە، ەڭ قۇندى دجينسى 1879 جىلى شىعارىلعان ءتۇپنۇسقا «Levi's» شالبارى بولىپ سانالادى. ول وتكەن عاسىردىڭ 90-جىلدارىندا نيەۆاداداعى قاراۋسىز قالعان شاحتالاردىڭ بىرىنەن تابىلعان. سودان بەرى ەسكى دجينسى بىرنەشە رەت جەكە كوللەكسيانەرلەردىڭ قولىنان ءوتىپ ءجۇرىپ، ودان «Levi's» مۇراجايىنا تۇراقتاعان بولاتىن. ءبىراق 2005 جىلى ونلاين-اۋكسيوندا ونى اتىن قۇپيا قالدىرعان جاپون كوللەكسيونەرى بىرەگەي مودەلدى 60 مىڭ اقش دوللارىنا ساتىپ الادى. بۇل وقيعا گيننەستىڭ رەكوردتار كىتابىندا اۋكسيوندا ونلاين ساتىلعان ەڭ قىمبات دجينسى رەتىندە رەسمي تىركەلەدى.
بەسىكتەگى بالا دا كيەدى
دجينسىدى ءقازىر قارا جۇمىس ءۇشىن ەمەس، ءسان ءۇشىن كيەتىن بولعانبىز. ونى ۇلكەندەر تۇرماق، بەسىكتەگى بالاعا دا كيگىزىپ قويامىز. دەمەك، ادەمى. ءيا، دۇنيەجۇزىندە بىردە-بىر تۇرعىنى دجينسى كيمەيتىن ەل جوق. ايتپاقشى، تاريحتا الەمدەگى ەڭ كىشكەنتاي دجينسىلار باربي مەن كەنا قۋىرشاقتارىنا ارناپ تىگىلگەن كلاسسيكالىق ۇلگىدەگى كيىمدەر بولىپ قالدى.
چيليدەگى «Paris» امبەباپ دۇكەندەر جەلىسى 2019 جىلى «Kansas» ءسان برەندىمەن الەمدەگى ەڭ ۇلكەن دجينسىدى تىكتى. شالباردىڭ ۇزىندىعى 65،5 مەتر، ەنى 42،6 مەتر. 22 قاباتتى ءۇيدىڭ كولەمىندەي بولاتىن دجينسىدى جارتى جىل بويى 50 ادامنان تۇراتىن كوماندا تىككەن كورىنەدى. ايتپاقشى، گيننەستىڭ رەكوردتار كىتابىنا تىركەلگەننەن كەيىن، ەڭ ءداۋ شالباردى ەشكىم كيمەيدى عوي، ارينە، سوندىقتان ول قايتا وڭدەۋگە جىبەرىلەدى. ودان ەكولوگياعا زيان پوليەتيلەن پاكەتتەردىڭ ورنىنان پايدالانۋ ءۇشىن مىڭداعان سومكە تىگىلگەن ەكەن.
بيىلعى ترەند
دجينسى 1960 جىلدارى الەمنىڭ تۇكپىر-تۇكپىرىندە سانگە اينالا باستاعاندا ونىڭ قاتتى ماتەريالى ماقتاعا اۋىسقان ەكەن. بۇل شالباردى بوياۋعا ءالى كۇنگە ەڭ بەرىك بوياۋ – ينديگو پايدالانىلادى.
دجينسىدى اسا ىستىق سۋعا جۋۋعا بولمايدى. ونى جۋۋعا 40°س جىلىلىقتاعى سۋ جەتكىلىكتى. جۋعان كەزدە سىركە سۋىن قوسساڭىز ارتىق ەتپەيدى. كۇن كوزىنە كەپتىرمەگەن دۇرىس. كەپپەگەن، دىمقىل دجينسىدى كيۋگە بولمايدى، تىزەسى مەن بوكسە تۇسى سوزىلىپ كەتەدى.
شەندى-شەكپەندىلەر دە ۇنەمى تىكەسىنەن تىك جۇرۋگە تۋرا كەلەتىن كلاسسيكالىق شالباردان جالىعاتىنى حاق، ولار دا ادام. سوندىقتان بولار، 2009 جىلى ليتۆالىق مينيسترلىكتەردىڭ كەيبىرىندە «دجينسى جۇماسى» اتتى زاڭ شىققان ەكەن. بۇل كۇنى مەملەكەتتىك قىزمەتكەرلەرگە جۇمىسقا دجينسىمەن كەلۋگە رۇقسات ەتىلگەن. ءيا، قاتقان شالباردى دا ءادىسىن تاۋىپ اسقان تالعاممەن جۇمىس ورنىڭىزعا دا كيىپ كەلۋگە بولادى.
ايتپاقشى، بيىل دەنەگە جابىسىپ تۇراتىن ەمەس، كەڭ بالاقتى دجينسى ترەندتە. ساننەن قالىپ قويمايىق.