بۇگىن - ساياسي قۋعىن-سۇرگىن قۇرباندارىن ەسكە الۋ كۇنى

ساياسي قۋعىن-سۇرگىنگە ۇشىراعاندار سانى 5 ملن-نان اسادى.

تاريح عىلىمدارىنىڭ دوكتورى، قۇربانداردى تولىق اقتاۋ جونىندەگى مەملەكەتتىك كوميسسيا مۇشەسى زيابەك قابىلدينوۆ وسىنداي دەرەكتەر كەلتىرەدى، دەپ حابارلايدى Almaty-akshamy.kz 24.kz-كە سىلتەمە جاساپ.

 ونىڭ ىشىندە بىرنەشە مارتە قۋدالانىپ، بيلىكتەن تەپەرىش كورگەن تۇلعالار دا بار.

عالىم: «بارلىعىن قوسا ساناعاندا 5 ملن دەرەكتى انىقتادىق»، – دەيدى.

2020 جىلى پرەزيدەنت پارمەنىمەن ارنايى جۇمىس توبى قۇرىلعان ەدى. تاريحتىڭ اقتاڭداق تۇسىن زەرتتەپ، بوزداقتاردى اقتاۋعا 425 عالىم تارتىلدى. ولار عىلىمي جاڭالىقتارىن 72 توم كىتاپ ەتىپ جازىپ شىقتى. 

زيابەك قابىلدينوۆ، ق ر بعم ش. ءۋاليحانوۆ اتىنداعى تاريح جانە ەتنولوگيا ينستيتۋتىنىڭ ديرەكتورى:

الدىن الا جوبالاپ شىعارعان سيفرا وسى قۋعىن-سۇرگىنگە، ونىڭ ىشىندە بايلار بار، ونىڭ ىشىندە كۋلاكتار بار، ونىڭ ىشىندە دەپارتاسيالانعان حالىقتار بار، ونىڭ ىشىندە سول رەسپۋبليكادان باسقا رەسپۋبليكاعا قاشقاندار بار، ونىڭ ىشىندە تورە تۇقىمدارى بار، اعا-سۇلتاندار بار. سولاردىڭ ءبارىن ساناعاندا ءبىر 5 ملن سانىنا جەتىپ قالدى. ونىڭ سانى نەگە كوپ ەكەنىن ءتۇسىندىرىپ ايتايىن. ەكى، ءۇش، ءتىپتى ءتورت رەت زاڭعا تارتىلىپ قۋدالانعانداردى ساناعاندا سيفرا ۇلكەن بولىپ تۇر. ونى ەندى تولىق انىقتاپ، 3-4 رەت ەمەس، ءبىر رەت ساناعاندا قانشا شىعاتىنى – ول بولاشاقتىڭ زەرتتەۋى.