سپورت كۇنى - قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازاربايەۆتىڭ 2003 جىلدىڭ 15 قاراشاسىنداعى جارلىعىنا سايكەس تامىز ايىنىڭ ءۇشىنشى جەكسەنبىسىندە اتاپ وتىلەدى.
قازاقستاندىقتار سپورت كۇنىن اتاپ وتۋدە، دەپ حابارلايدى Almaty-akshamy.kz قازاقپارات-قا سىلتەمە جاساپ.
سپورت سالاسى قازاقستاندا كەڭ قولداۋعا يە. ەلدە سپورتتىڭ دامۋىنا بۇقارالىق سپورت قوزعالىسىن كەڭەيتۋگە، سپورتتاعى جەتىستىكتەردى ىنتالاندىرۋعا باعىتتالعان ساياسات ىقپال ەتۋدە. قازاقستاندىق سپورتشىلار سوڭعى ونجىلدىقتاردا حالىقارالىق جارىستاردا، وليمپيادا ويىندارىندا ۇزدىك ناتيجەلەردى كورسەتىپ كەلەدى. مەملەكەتتىڭ ءوزى بەدەلدى حالىقارالىق جارىستاردى وتكىزەتىن ورىنعا اينالۋدا. جاقىندا ق ر مەملەكەتتىك حاتشىسى قىرىمبەك كوشەربايەۆ ەلىمىزدىڭ سپورت سالاسىنا كەزەك كۇتتىرمەس رەفورمانىڭ قاجەتتىگىن العا تارتتى. بىلتىر ەلىمىزدە دەنە شىنىقتىرۋ جانە بۇقارالىق سپورتتى دامىتۋ جونىندەگى 2020-2025 جىلعا ارنالعان كەشەندى جوسپارى ازىرلەندى. بۇل جوسپاردا مۇددەلى مەملەكەتتىك ورگانداردىڭ، جەرگىلىكتى اتقارۋشى ورگانداردىڭ ۇسىنىستارى تولىق ەسكەرىلiپ، ق ر پرەمەر-مينيسترىمەن بەكىتىلدى. كەشەندى جوسپار 34 تارماق پەن 5 نەگىزگى باعىتتان تۇرادى: نورماتيۆتىك-قۇقىقتىق قامتاماسىز ەتۋ، مەكتەپ جانە ستۋدەنتتىك سپورت، سپورت جەلىلەرىن كەڭەيتۋ، سالاۋاتتى ءومىر سالتىن ناسيحاتتاۋ جانە كەڭىنەن تاراتۋ، سپورتتىق-بۇقارالىق ءىس-شارالارى. جاقىندا پرەمەر-مينيستردىڭ ورىنباسارى ە. توعجانوۆ ەلىمىزدە بۇقارالىق جانە بالالار سپورتىن دامىتۋدىڭ قازىرگى پروبلەمالارى مەن پەرسپەكتيۆالارى جونىندە ارنايى كەڭەس وتكىزدى. بيىل حالىقتىڭ سپورتپەن شۇعىلدانۋىن كەمىندە 35% ناتيجەگە جەتكىزە وتىرىپ (بۇگىنگى كۇنى – 31،6%)، نىسانالى كورسەتكىشتەردى قايتا قاراۋ تاپسىرىلدى. ول ءۇشىن اكىمدىكتەرگە مەملەكەتتىك سپورتتىق تاپسىرىس كولەمىن ۇلعايتۋ، قوسىمشا بالالار، جاسوسپىرىمدەر كلۋبتارىن، بالالار-جەتكىنشەكتەر سپورت كلۋبتارىن اشۋ، مەكتەپ جانە ستۋدەنتتەر سپورت ليگالارىنىڭ جۇمىسىن قايتا باستاۋ ەسەبىنەن بالالارعا ارنالعان تەگىن سپورت سەكسيالارىن كەڭەيتۋ جۇكتەلدى. سونداي-اق قوستاناي، اتىراۋ جانە ماڭعىستاۋ وبلىستارىندا سپورت مەكتەپ-ينتەرناتتارىنىڭ بولماۋىنا بايلانىستى وسى وڭىرلەردىڭ اكىمدىكتەرىنە ولاردىڭ قۇرىلىسىن باستاۋ ماسەلەسىن شەشۋ تاپسىرىلدى. سپورت نىساندارىنىڭ تولىق جۇكتەلۋىنە ەرەكشە نازار اۋدارۋ ماسەلەسىنە ەكپىن قويىلدى.