بۇل سايلاۋ پرەزيدەنت قاسىم-جومارت توقايەۆتىڭ جولداۋىنداعى تاپسىرماعا سايكەس وتكىزىلەدى.
بۇگىن ەلىمىزدە 730 ەلدى مەكەننىڭ اكىمى سونداعى تۇرعىنداردىڭ تىكەلەي داۋىس بەرۋى ارقىلى انىقتالماق، دەپ حابارلايدى Almaty-akshamy.kz
مۇنداي اكىمدەر سايلاۋى تاۋەلسىز قازاقستاننىڭ تاريحىندا تۇڭعىش رەت وتكەلى وتىر.
2021 جىلدان باستاپ اۋىل اكىمدەرىنىڭ تىكەلەي سايلاۋىن وتكىزۋ تۋرالى پرەزيدەنت قاسىم-جومارت توقايەۆتىڭ «جاڭا جاعدايداعى قازاقستان: ءىس-قيمىل كەزەڭى» اتتى جولداۋىندا تاپسىرما بەرىلگەن بولاتىن.
اۋماقتىق سايلاۋ كوميسسيالارىنىڭ مالىمەتى بويىنشا، وسى 730 سايلاۋ وكرۋگىندە 2582 كانديدات ۇسىنىلعان. سولاردىڭ 2297ء-ى تىركەۋدەن وتكەن. كانديداتتاردىڭ باسىم بولىگى – ءوزىن-وزى ۇسىنۋشىلار. سايلاۋ تۋرالى زاڭناماعا ەنگىزىلگەن تولىقتىرۋلار مەن تۇزەتۋلەردىڭ ارقاسىندا اۋىل اكىمدەرىنىڭ سايلاۋىنا تۇسكىسى كەلەتىن ۇمىتكەرگە ءوزىن-وزى ۇسىنۋ مۇمكىندىگى بەرىلگەن بولاتىن. وسى مۇمكىندىكتى بۇل جولعى سايلاۋدا 1419 ادام پايدالانىپ وتىر، -دەپ جازدى قازاقپارات.
سونداي-اق، 878 ۇمىتكەردى ادىلەت مينيسترلىگىنىڭ تىركەۋىندە بار 6 ساياسي پارتيا ۇسىنعان. حالىقتىڭ داۋىس بەرۋى ارقىلى اكىم بولعىسى كەلەتىندەردىڭ گەندەرلىك قۇرامىنا كەلسەك، ەر ۇمىتكەرلەردىڭ سانى –1839. سولارمەن بىرگە 458 ايەل ۇمىتكەر دە باعىن سىناعالى وتىر. ءوز ۇمىتكەرلەرىن ۇسىنعان پارتيالاردىڭ اتىنان قاتىساتىن بايقاۋشىلاردان بولەك، «پارتيالىق ەمەس باقىلاۋشىلار ورتالىعى» رەسپۋبليكالىق قوعامدىق بىرلەستىگى دە داۋىس بەرۋ پروسەسىنىڭ ءادىل ءوتۋىن قاداعالاماقشى.
«سايلاۋ ءۇردىسىنىڭ بارلىق ەرەكشەلىكتەرىن ەسكەرەتىن بايقاۋشىنىڭ بلوكنوتىن ازىرلەپ، بايقاۋشىلاردىڭ بارىنە تاپسىردىق. سايلاۋ كۇنى زاڭبۇزۋشىلىق انىقتالسا، سول بلوكنوتقا تىركەپ وتىرادى. بايقاۋشىلاردىڭ بارىنە سايلاۋ ۋچاسكەلەرىنە كىرۋگە قاجەت قۇجاتتار بەرىلدى. دايىندىق 100 پايىز دەپ ايتۋعا بولادى. ءبىزدىڭ باسقا بايقاۋشىلاردان ەرەكشەلىگىمىز – قاتاڭ بەيتاراپتىق تانىتامىز. ەشقانداي پارتيا وكىلدەرىنە دە، مەملەكەت بيلىگىنە دە، قانداي دا ءبىر سايلاۋ ۋچاسكەسىنىڭ كوميسسيا مۇشەلەرىنە دە - بارىنە قاتاڭ تۇردە بەيتاراپ ۇستانىمدا بولامىز. زاڭنامالىق تۇرعىدا سايلاۋ ۇدەرىسىنە كەدەرگى جاساماي، بايقاۋ جۇرگىزەمىز»، - دەيدى بىرلەستىكتىڭ ءتوراعاسى تولەگەن كۇنادىلوۆ.
بۇگىنگى سايلاۋ 14 وبلىس بويىنشا 1847 سايلاۋ ۋچاسكەسىندە وتەدى. 25 مامىردا پرەزيدەنت قاسىم-جومارت توقايەۆ سايلاۋ تۋرالى كونستيتۋسيالىق زاڭعا وزگەرتۋلەر مەن تولىقتىرۋلار ەنگىزۋدى كوزدەيتىن قۇجاتقا قول قويعان بولاتىن. سايلاۋ وتكىزىلگەننەن كەيىن ءۇش كۇن ىشىندە بۇگىنگى كۇننىڭ قورىتىندىسى شىعارىلۋى كەرەك. جەتى كۇن ىشىندە سايلانعان اكىمدى تىركەۋ جۇزەگە اسىرىلادى. بۇل رەتتە سايلانعان اكىمنىڭ وكىلەتتىگى ونى ءتيىستى اۋماقتىق سايلاۋ كوميسسياسى تىركەگەن كەزدەن باستالادى.
جالپى، بيىل جىل اياعىنا دەيىن 775 اۋىل اكىمى سايلانادى. ەلىمىزدە بارلىعى 2346-عا جۋىق اۋىل اكىمى بار. وسىنى ەسكەرسەك، 2022 جىلدىڭ باسىندا اۋىل اكىمدەرىنىڭ قۇرامى ۇشتەن بىرگە جاڭارادى دەگەن ءسوز.
وڭىرلەردىڭ اۋقىمىن ەسەپكە الماستان سارالايتىن بولساق، بۇل جولعى سايلاۋدا اكىمىن انىقتايتىن ەلدى مەكەندەر سانى بويىنشا اقمولا وبلىسى كوش باستاپ تۇر. مۇندا ءبىر كۇندە 95 اۋىل مەن اۋىلدىق وكرۋگتىڭ، اۋداندىق ماڭىزى بار قالا مەن كەنتتىڭ اكىمى سايلانادى.
العاشقى ۇشتىكتى شىعىس قازاقستان (77) جانە قاراعاندى وبلىستارى (75) تۇيىندەپ تۇر. ال ماڭعىستاۋ وبلىسىندا بۇل جولى بار-جوعى 10، اتىراۋ وبلىسىندا 18 ەلدى مەكەننىڭ اكىمى تىكەلەي سايلاۋ ارقىلى قىزمەتكە كەلمەك.