ءقادىر ءتۇنى – رامازان ايىنىڭ سوڭعى ون ءتۇنىنىڭ ءبىرى. ياعني، ون ءتۇننىڭ بىرىنە جاسىرىلعان. ال 27ء-شى ءتۇن – ءقادىر ءتۇنى بولۋى ەڭ ىقتيمال ءتۇن.
ءقادىر ءتۇنى قاشان؟
بيىل 23 ناۋرىزدا باستالعان قاسيەتتى رامازان ايى 20 ساۋىردە اياقتالادى. ال مىڭ ايدان دا قايىرلى ءقادىر ءتۇنى ءساۋىر ايىنىڭ 17-نەن 18-نە قاراعان تۇنگە ءتۇسىپ تۇر.
ايلاردىڭ سۇلتانى رامازان ايى بولسا، تۇندەردىڭ ەڭ قاسيەتتىسى ءقادىر ءتۇنى سانالادى. ويتكەنى بۇل ءتۇنى قۇران كارىمنىڭ اياتتارى تۇسە باستاعان.
ءقادىر ءتۇنى جاسالعان عيبادات 83 جىلدىق ساۋاپقا پارا-پار. جالپى، «ءقادىر» دەگەن ءسوزدىڭ ءوزى اراب تىلىنەن «تاعدىر» دەگەن ماعىنا بەرەدى. سول سەبەپتى بۇل تۇندە ادامنىڭ ءبىر جىلدىق تاعدىرى عانا ەمەس، ريزىق-نەسىبەسى دە جازىلادى.
ءقادىر ءتۇنىنىڭ بەلگىلەرى
ءقادىر ءتۇنىنىڭ بەلگىلەرى جايىندا پايعامبارىمىز: «ءقادىر تۇنىندە اسپان اشىق بولادى. ىستىق تا، سۋىق تا بولمايدى. كۇن قىزىل بولىپ شىعادى»، – دەگەن.
تاعى ءبىر حاديستە: «ءقادىر ءتۇنى تۇنىق ءارى جارىق بولىپ، ايدىڭ ءوزى بەينە ءبىر نۇرعا تولى بولادى. ول ءتۇن سۋىق تا ىستىق تا ەمەس، تىنىش تا جايلى بولىپ، تاڭ اتقانشا جۇلدىزداردىڭ اعىپ تۇسۋىنە تىيىم سالىنادى. بۇل ءتۇننىڭ تاعى ءبىر بەلگىسى، تاڭەرتەڭ كۇن ساۋلەسى، تولعان اي سەكىلدى ءتۇزۋ بولىپ شىعادى ءارى شايتاندارعا كۇنمەن بىرگە جارىسا شىعۋلارىنا رۇقسات ەتىلمەيدى»- دەلىنگەن.
سونداي-اق قاسيەتتى تۇندە بۇلت تا، جاڭبىر دا، جەل دە بولمايدى.
ءقادىر ءتۇنى نە ىستەۋ كەرەك
وكىنىشكە قاراي، كوبى ءقادىر ءتۇنىن جاي عانا ۇيىقتاماي قارسى الۋ جەتكىلىكتى دەپ سانايدى. الايدا بۇل قاتە تۇسىنىك. اللانىڭ مەيىرىمىنەن ءۇمىت ەتكەن ءاربىر ادام ءقادىر ءتۇنى كىرمەستەن بۇرىن دارەت الىپ، تازا كيىم كيىپ، ۇستىنە حوش ءيىستى ءاتىر سەۋىپ، قاسيەتتى ءتۇندى كۇتۋگە دايىندىق جاساۋعا ءتيىس.
ءقادىر ءتۇنى ماقسات – تەك ۇيىقتاماي، وياۋ ءجۇرۋ ەمەس، تىلەك تىلەپ، دۇعا جاساپ، ناماز وقۋ.
قاسيەتتى ءتۇندى كوڭىل كوتەرۋ ورىندارىندا ەمەس، ۇيدە نەمەسە مەشىتتە وتكىزگەن ابزال. ىشىمدىك ىشۋگە، ادامداردىڭ سىرتىنان عايباتتاپ، وسەك ايتۋعا، جانجالداسۋعا، داۋلاسۋعا تىيىم سالىنادى. دوستارمەن كوڭىل كوتەرىپ، ءان ايتۋعا، بيلەۋگە، ساۋىق كەشىن ۇيىمداستىرۋعا بولمايدى. ال تەلەديداردان ويىن-ساۋىق باعدارلامالارى مەن فيلمدەردىڭ ورنىنا تاربيەلىك ءمانى بار دۇنيەلەردى تاماشالاعان دۇرىس.
ءقادىر ءتۇنىنىڭ قۇرمەتىنە داستارحان جايۋدىڭ قاجەتى جوق. ۇيگە جاقسىلىق كىرەدى دەپ ەسىك-تەرەزەلەردى اشىپ قويۋ دا – قاتە.
مۇسىلماندار بۇل ءتۇندى بارىنشا قۇلشىلىقپەن، شىن جۇرەكتەن وكىنىپ، كۇنالارى ءۇشىن كەشىرىم سۇراۋمەن وتكىزۋگە ءتيىس. تاڭعا دەيىن قاسيەتتى قۇران كىتابىن وقىپ، دۇعا جاساعان ابزال.
ءقادىر ءتۇنى وقىلاتىن دۇعالار
ايشا (ر.ا.) انامىز پايعامبارىمىزدان (س.ع.س) : «ۋا، اللانىڭ ەلشىسى، ءقادىر تۇنىندە قانداي دۇعا جاسايىن»،- دەپ سۇراعاندا، اللا ەلشىسى: «ۋا اللام! سەن كەشىرىمدىسىڭ، كەشىرۋدى سۇيەسىڭ، مەنىڭ كۇنالارىمدى كەشىرە گور»، - دەپ دۇعا ەتۋگە كەڭەس بەرگەن.
ءقادىر ءتۇنىنىڭ قۇرمەتىنە راببىمىزدان بارشا مۇسىلماننىڭ اماندىعىن، ءوزارا دوستىق پەن باۋىرماشىلدىقتىڭ ارتۋىن، يسلام الەمىنىڭ ءبىرتۇتاستىعى مەن كۇللى ادامزاتتى اپاتتاردان ساقتا دەپ تىلەۋىمىز شارت.
ءقادىر ءتۇنى قاي ۋاقىتقا دەيىن جالعاسادى
ءقادىر كەشى كۇن باتىپ، اۋىز اشقان ساتتەن باستاپ تاڭ اتاتىن ۋاقىتقا دەيىن جالعاسادى.