مامىردىڭ ءار ءتورتىنشى جەكسەنبىسىندە ق ر قارۋلى كۇشتەرىنىڭ مادەنيەت جانە ونەر قىزمەتكەرلەرى كاسىبي مەرەكەسىن اتاپ وتەدى.
قازاقستان ارمياسىنداعى شىعارماشىلىق كاسىپتەر وكىلدەرىن بىرىكتىرەتىن ورتالىق مادەنيەت مەكەمەسى – قارۋلى كۇشتەردىڭ ۇلتتىق اسكەري-پاتريوتتىق ورتالىعى كوپفۋنكسيونالدى مەكەمە بولىپ تابىلادى. بۇل ورتالىق 2015 جىلى اشىلدى. وعان ورتالىق انسامبل، ورتالىق اسكەري وركەستر جانە وڭىرلىك گارنيزونداردىڭ فيليالدارى كىرەدى، دەپ حابارلايدى aqshamnews.kz قورعانىس مينيسترلىگىنە سىلتەمە جاساپ.
ورتالىقتا جيىرما مىڭنان استام ەكسپوناتى بار قارۋلى كۇشتەردىڭ اسكەري-تاريحي مۋزەيى جۇمىس ىستەيدى. مەكەمە ماماندارى سيرەك كەزدەسەتىن تاريحي جانە مادەني ەسكەرتكىشتەردى دارىپتەۋ، وق-دارىلەردى، قارۋ-جاراقتاردى، اسكەري تاريحقا قاتىستى بىرەگەي قۇجاتتار مەن فوتوسۋرەتتەردى ساقتاۋ جونىندە قاجىرلى جۇمىس اتقارىپ كەلەدى.
جاستاردى اسكەري-پاتريوتتىق تاربيەلەۋگە كوپ كوڭىل بولىنەدى. بۇگىندە 280 مىڭنان استام بالا مەن ءجاسوسپىرىم «جاس سارباز» رەسپۋبليكالىق بالالار-جاسوسپىرىمدەر قوزعالىسىنا بىرىكتىرىلدى. قوزعالىس تاربيەلەنۋشىلەرى اسكەري-پاتريوتتىق كلۋبتاردا، «جاس سارباز» سىنىپتارىندا جانە Smart Sarbaz ۇيىرمەلەرىندە اسكەري ءىستىڭ نەگىزدەرىن مەڭگەرۋدە. ءۇاپو جانىنداعى «جاس سارباز» شىعارماشىلىق ستۋدياسىندا قارۋلى كۇشتەردىڭ، باسقا دا اسكەرلەر مەن اسكەري قۇرالىمداردىڭ اسكەري قىزمەتشىلەرىنىڭ بالالارى دومبىرا تارتۋدى، ءان سالۋدى جانە حورەوگرافيانى ۇيرەنەدى.
ۇلتتىق اسكەري-پاتريوتتىق ورتالىقتا ءۇشىنشى جىل قاتار مەرزىمدى قىزمەت ساربازدارىنىڭ شىعارماشىلىق ۆزۆودى اسكەري بورىشىن وتەيدى. قىزمەت اياقتالعان سوڭ جاستار الدىندا جاڭا مۇمكىندىكتەر اشىلادى. ولار جوعارى وقۋ ورىندارىنا جەڭىلدىك شارتتارىمەن تۇسە الادى نەمەسە قارۋلى كۇشتەردىڭ شىعارماشىلىق ۇجىمدارىندا كەلىسىمشارت بويىنشا قىزمەتىن جالعاستىرۋىنا بولادى.
قارۋلى كۇشتەردىڭ مادەنيەت جانە ونەر قىزمەتكەرلەرى وزدەرىنىڭ كۇندەلىكتى ەڭبەكتەرىمەن ءپاتريوتيزمدى قالىپتاستىرۋعا، ەلدىڭ مادەني مۇراسىن ساقتاۋعا جانە نىعايتۋعا ەلەۋلى ۇلەس قوسىپ كەلەدى.