ق ر وقۋ-اعارتۋ مينيسترلىگىنىڭ ءبىلىم سالاسىندا ساپانى قامتاماسىز ەتۋ كوميتەتى ورتا ءبىلىم بەرۋ ۇيىمدارىنىڭ قىزمەتىنە كەشەندى تالداۋ جۇرگىزىپ، ەلىمىزدەگى ەڭ ۇزدىك 100 مەكتەپتى انىقتادى.
بۇل تۋرالى aqshamnews.kz ءتيىستى ۆەدومستۆونىڭ سايتىنا سىلتەمە جاساي وتىرىپ حابارلايدى.
باعالاۋ كەزىندە ءبىلىم بەرۋ ساپاسىن سىرتتاي باعالاۋ ناتيجەلەرى، مەكتەپتەرگە ارنالعان PISA جانە PISA حالىقارالىق زەرتتەۋلەرىنە قاتىسۋ، ءبىلىم الۋشىلاردىڭ ءبىلىم جەتىستىكتەرىنىڭ مونيتورينگى دەرەكتەرى (ببجم)، مەملەكەتتىك اتتەستاتتاۋ قورىتىندىلارى، وقۋشىلاردىڭ جەتىستىكتەرى، پەداگوگتەردىڭ بىلىكتىلىگى، ينكليۋزيۆتى ءبىلىم بەرۋ ءۇشىن جاعداي جاساۋ، تاربيە جۇمىسىنىڭ تيىمدىلىگى، قولايلى مەكتەپ احۋالى، عىلىمي، ەكولوگيالىق جانە الەۋمەتتىك جوبالارعا قاتىسۋ بويىنشا باقىلاۋ جانە باعالاۋ ءىس-شارالارىنىڭ قورىتىندىلارى نەگىزىندە كەشەندى تالداۋ جۇرگىزىلدى. سونىمەن قاتار باسقارۋداعى اشىقتىق قاعيداتتارى دا ەسكەرىلدى.
«بۇل ەڭ ۇزدىك مەكتەپتەردىڭ ءتىزىمى عانا ەمەس. بۇل – مۇعالىمدەر مەن مەكتەپ اكىمشىلىگىنەن باستاپ اتا-انالار مەن وقۋشىلارعا دەيىنگى بارلىق مەكتەپ ۇجىمىنىڭ ۇيلەسىمدى، كاسىبي جانە جاۋاپتى جۇمىسىنىڭ كورىنىسى. ءار بالا ءوزىن قولدايتىن، شابىتتاندىراتىن جانە الەۋەتىن اشۋعا كومەكتەسەتىن مەكتەپتە وقۋى كەرەك»، – دەپ اتاپ ءوتتى ءبىلىم سالاسىندا ساپانى قامتاماسىز ەتۋ كوميتەتى ءتوراعاسىنىڭ ورىنباسارى مايرا مەلدەبەكوۆا.
باستاما ورتا ءبىلىم بەرۋ ساپاسىن ارتتىرۋعا جانە بالالاردى وقىتۋ مەن تاربيەلەۋ بويىنشا ءتيىمدى ادىستەمەلەردى تاراتۋعا باعىتتالعان جانە ول جىل سايىنعى پراكتيكاعا اينالادى.
ەستەرىڭىزگە سالا كەتەيىك، قازاقستاندا 8 مىڭ مەكتەپ جۇمىس ىستەيدى، وندا 3،9 ميلليوننان استام بالا وقيدى جانە 412 مىڭ پەداگوگ ەڭبەك ەتەدى.
