باۋىرلاس وزبەكستاندا باستى مەرەكە – تاۋەلسىزدىك كۇنى اتالىپ وتىلۋدە
بيىل رەسپۋبليكا ەگەمەندىگىن العانىنىڭ 30 جىلدىق مەرەيتويىن تويلاپ جاتىر، دەپ حابارلايدى Almaty-akshamy.kz قازاقپارات سايتىنا سىلتەمە جاساپ.
اتالعان مەرەكەلىك ءىس-شارالار بۇكىل رەسپۋبليكا بويىنشا وتۋدە. ولاردىڭ ەڭ اۋقىمدىلارى تاشكەنتتە. مەرەكەگە ورايلاستىرىلعان ءىس-شارالار «جاڭا وزبەكستان» جاڭا ساياباعىندا ءوتتى. ول رەسپۋبليكا مەرەيتويىنا ارنايى جاسالعان. ساياباق اعاشتىڭ بەس بۇتاعى ىسپەتتى، ول وزبەكستاننىڭ دامۋ ستراتەگيالارىنىڭ باعىتتارىن بىلدىرەدى. ساياباقتىڭ جانىندا وزبەكستان تاۋەلسىزدىگىنىڭ 30 جىلدىعىنا ارناپ «يستيكلول» (تاۋەلسىزدىك) كەشەنى تۇرعىزىلعان.
ول – وزبەك حالقىنىڭ 3 000 جىلدىق تاريحي بەينەسى، ۇلتتىق سانا مەن وزبەكستاننىڭ جاڭا كەلبەتىنىڭ كورىنىسى. ەل پرەزيدەنتى شاۆكات ميرزيويەۆ بارلىق وزبەكستاندىقتاردى مەرەكەمەن قۇتتىقتادى.
«1991 جىلدىڭ 31 تامىزى رەسپۋبليكا تاعدىرى ءۇشىن شەشۋشى بولعان ۇلى تاريحي وقيعا بولدى. بولاشاققا ءارقاشان سەنىممەن، ۇلكەن ۇمىتپەن قاراعان ءبىزدىڭ حالقىمىز ءوزىنىڭ كوپ عاسىرلىق ارمانىنا جەتتى – تاۋەلسىزدىگىن الدى.ءبىز ءبىرىنشى رەت تاۋەلسىزدىك كۇنىن وسى ساياباقتا اتاپ ءوتىپ وتىرمىز. وعان «يانگي ۋزبەكسيتون» اتاۋى بەرىلدى. شىن جۇرەكتەن حالىقتى مەرەكەمەن قۇتتىقتايمىن جانە ىزگى تىلەكتەرىمدى بىلدىرەمىن»، - دەدى شاۆكات ميرزيويەۆ.
سالتاناتتى ءىس-شارالاردىڭ شارىقتاۋ شەگى وتشاشۋ بولدى. 2021 جىلى قيىن ەپيدەميولوگيالىق احۋالعا بايلانىستى شارالاردىڭ كوبى ونلاين وتەدى. كەيبىر كونسەرتتەر كارانتين شارالارىن ساقتاي وتىرىپ، الدىن الا جازىلىپ جاتىر.
ۇيىمداستىرۋشىلار بۇل جاعدايدىڭ دەمالىس ساپاسى مەن ازاماتتاردىڭ مەرەكەلىك كوڭىل-كۇيىنە اسەر ەتپەيتىنىنە ۇمىتتەنەدى.
ايتا كەتەيىك، وزبەكستان رەسپۋبليكاسىنىڭ تاۋەلسىزدىك كۇنى 1991 جىلعى 31 تامىزدا مەملەكەتتىك تاۋەلسىزدىكتى جاريالاۋ قۇرمەتىنە جىل سايىن 1 قىركۇيەكتە تويلانادى.