بۇگىن قازاقستاندا مەتاللۋرگيا سالاسى قىزمەتكەرلەرىنىڭ كاسىبي مەرەكەسى اتاپ وتىلەدى، - دەپ حابارلايدى aqshamnews.kz ءتىلشىسى.
مەتاللۋرگ كۇنى قازاقستان پرەزيدەنتىنىڭ 2003 جىلعى جارلىعىمەن بەكىتىلگەن. بۇل مەرەكە جىل سايىن شىلدەنىڭ ءۇشىنشى جەكسەنبىسىندە اتاپ وتىلەدى. ول - ەلدىڭ ونەركاسىپ سەكتورى ءۇشىن ەڭ ماڭىزدى مەرەكەلەردىڭ ءبىرى.
قارا مەتاللۋرگيا - اۋىر ونەركاسىپتىڭ نەگىزگى سالالارىنىڭ ءبىرى. ەكونوميكاسى دامىعان مەملەكەتتەردە مەتاللۋرگياعا ايرىقشا ءمان بەرىلەدى. سەبەبى شويىن مەن بولات ءوندىرىسىنسىز عىلىمي-تەحنيكالىق پروگرەستى دامىتۋ مۇمكىن ەمەس. ءدال وسى مەتاللۋرگيا - قۇرىلىس، ماشينا جاساۋ، كەمە جاساۋ، ۇشاق قۇراستىرۋ جانە باسقا دا ماڭىزدى وندىرىستىك جانە ەكونوميكالىق سالالار ءۇشىن شيكىزات پەن جۇمىس ماتەريالى.
سونداي-اق، قازاقستاننىڭ ءتۇستى مەتاللۋرگياسى - ەلدىڭ ەڭ كونە جانە جەتەكشى ونەركاسىپ سالاسى. ونىڭ دامۋى ەلىمىزدىڭ اسا باي پايدالى قازبالار قورىنا نەگىزدەلگەن جانە قازاقستاننىڭ بۇكىل وندىرىستىك كەشەنىنىڭ قالىپتاسۋىنا زور ىقپال ەتەدى.
قازاقستان ءتۇستى مەتاللۋرگياسىنىڭ باستى ارتىقشىلىعى - ءوزىنىڭ مينەرالدىق-شيكىزات بازاسىنىڭ بولۋى. ەل اۋماعىندا ءتۇستى مەتالل كەندەرىنىڭ مول قورى بار. ءتۇستى مەتالدارعا مىس، مىرىش، قالايى، قورعاسىن، ميشياك، سۇرمە جانە سىناپ كەن ورىندارى جاتادى.
سونىمەن قاتار، باعالى مەتالداردى (كۇمىس، التىن جانە باسقا دا سيرەك كەزدەسەتىن مەتالدار – وسميي، پاللاديي، يريديي، روديي) ءوندىرۋ جانە ولاردى قايتا وڭدەۋ - قازاقستاننىڭ التىن-ۆاليۋتا قورىن تولىقتىراتىن نەگىزگى كوزدەردىڭ ءبىرى. الەمدە ەڭ جوعارى باعالاناتىن وسى قىمبات مەتالل وندىرىسىنە ەل بارىنشا كۇش جۇمساپ وتىر.