بۇگىن - مەملەكەتتىك قىزمەتشىلەر كۇنى

ەلىمىزدە 23 ماۋسىم ەلىمىزدە مەملەكەتتىك قىزمەتشى كۇنى بولىپ ەسەپتەلەدى 

2003 جىلدىڭ ناۋرىزىندا بۇۇ باس اسسامبلەياسى 23 ماۋسىمدى مەملەكەتتىك قىزمەت كۇنى دەپ جاريالاعان قارار قابىلداعان ەدى. قازاقستان بۇل مەرەكەنى 10 جىلدان كەيىن بەكىتتى – 2013 جىلى 23 ماۋسىم قازاقستاندا دا مەملەكەتتىك قىزمەتشىلەر كۇنى اتاندى. ال 2014 جىلدان باستاپ بۇل كۇن كاسىبي مەرەكە رەتىندە تويلانا باستادى.

ايتا كەتەيىك، بيىل ناۋرىز ايىندا مەملەكەت باسشىسى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مەملەكەتتىك قىزمەت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭعا قول قويعان.

بۇل قۇجات مەملەكەتتىك ساياسي قىزمەتشىلەردىڭ جاۋاپكەرشىلىگىن كۇشەيتۋ جانە سىبايلاس جەمقورلىق قىلمىستارىنىڭ الدىن الۋعا قاتىستى نورمالاردى قامتىعان. سونداي-اق زاڭدا مەملەكەتتىك ورگاندارعا كەلىسىمشارتتىق قىزمەتشىلەردى جۇمىلدىرۋعا جانە روتاسيالاۋ تەتىگىن جەتىلدىرۋگە قاتىستى ەرەجەلەر دە بار.

2023 جىلدىڭ 1 قاڭتارىنداعى جاعداي بويىنشا، مەملەكەتتىك قىزمەتشىلەر سانى 90 مىڭنان اسادى. مەملەكەتتىك قىزمەتتەگى ايەلدەردىڭ ۇلەسى 55،4 پايىزعا جەتتى.