بۇگىن – كورىسۋ كۇنى

جۇرت بىر-بىرىنە اق تىلەگىن ارنايدى

بۇگىن قازاق حالقىنىڭ كونەدەن كەلە جاتقان ءداستۇرلى مەرەكەسى - كورىسۋ كۇنى، دەپ حابارلايدى Almaty-akshamy.kz.

ۇلىستىڭ ۇلى كۇنى ناۋرىز مەرەكەسىنىڭ اۋقىمىن كەڭەيتۋ ءۇشىن ءتول جاڭا جىلدى كۇن مەن ءتۇن تەڭەلەردەن 10 كۇن بۇرىن باستاۋ ادەتكە اينالىپ كەلەدى. ون كۇندىك دۋماندى مازمۇندى ەتۋ اياسىندا كورىسۋ كۇنى رەسمي شارالاردىڭ قاتارىنا قوسىلىپ، بۇگىندە بۇكىل قازاق بىلەتىن ايتۋلى كۇنگە اينالىپ وتىر، دەپ جازدى قازاقپارات.

ءبىر كۇننىڭ اياسىمەن شەكتەلىپ قالماي، جىل بويى جالعاسا بەرەتىن كورىسۋ سالتى نەگىزىنەن باتىس قازاقستان، اتىراۋ وبلىستارىندا جانە اقتوبەنىڭ كەيبىر اۋداندارىندا، رەسەيدىڭ كورشىلەس استراحان، ساراتوۆ، ورىنبور وڭىرلەرىندە، قاراقالپاقستاندا اتالىپ وتەدى. ال ماڭعىستاۋ ءوڭىرىنىڭ جۇرتى ونى امال مەرەكەسى دەپ تە اتايدى.

ەجەلدەن كەلە جاتقان اتا سالتىمىز بويىنشا جاستار وسى كۇنى ۇلكەندەرگە سالەم بەرىپ، باتاسىن الادى. جۇرت بىر-بىرىنە اق تىلەگىن ارنايدى.

امال مەرەكەسىن ناۋرىزدان بولە-جارا قاراۋعا بولمايدى. ول - ناۋرىزدىڭ العاشقى جارشىسى ىسپەتتەس. امالدىڭ نەگىزگى شارتى - ۇلكەندى سىيلاۋ، كىشىگە قامقورلىق كورسەتۋ، ءالسىزدى دەمەۋ، جارلىنى جارىلقاۋ. بۇل كۇنى جاسى كىشىلەر ۇلكەندەرگە ارنايى سالەم بەرىپ، قول الىسىپ، ءتوس قاعىستىرادى. اقساقالدار «ءبىر جاسىڭ قۇتتى بولسىن!» دەپ، جاستارعا باتاسىن بەرەدى. بۇرىنعى وكپە-رەنىش كەشىرىلىپ، ارازدىق ۇمىتىلادى. ءۇي يەلەرى كەلگەندەرگە ءدام ۇسىنىپ، اق تىلەگىن جاۋدىرادى. وسىلايشا، كورىسۋ - باۋىرمالدىقتىڭ، كىشىپەيىلدىكتىڭ، قايىرىمدىلىقتىڭ مەرەكەسى سانالادى.