بۇگىن – ەلىمىزدە العىس ايتۋ كۇنى

قازاقستان – بىرنەشە ۇلت وكىلىنىڭ باسىن بىرىكتىرىپ وتىرعان مەملەكەت

1 ناۋرىز بارشا قازاقستاندىقتار العىس ايتۋ كۇنىن اتاپ وتەدى، دەپ حابارلايدى Almaty-akshamy.kz.

2016 جىلعى 14 قاڭتارداعى پرەزيدەنت جارلىعىنا سايكەس، قازاقستان حالقى اسسامبلەياسى قۇرىلعان 1 ناۋرىز – العىس ايتۋ كۇنى» دەپ جاريالاندى.

وسىلايشا سول جىلدان باستاپ ەلىمىزدە العىس ايتۋ كۇنى حالىق مەيرامى رەتىندە اتالىپ وتەدى. قازاقتا «قارعىس الما، العىس ال» دەگەن ءسوز بار. ادامنىڭ شىنايى ريزاشىلىعىنا بولەنۋ رۋحاني دەم بەرەدى.

قازاقستان – بىرنەشە ۇلت وكىلىنىڭ باسىن بىرىكتىرىپ وتىرعان مەملەكەت. العىس ايتۋ كۇنى - سونىڭ كۋاسى. سەبەبى بۇل كۇنى قازاقستاندىقتار ۇلتىنا، ءدىنى مەن جاس ەرەكشەلىگىنە قاراماستان، بىر-بىرىنە العىس ايتادى.

وسى مەرەكەدە ءبىرى اتا-اناسىنا العىس ايتىپ جاتسا، ەكىنشىسى وتانى مەن بۇقارا جۇرتقا ىقىلاسىن ءبىلدىرىپ جاتادى. سونىمەن قاتار اتاۋلى مەيرام كۇنى بارلىق وڭىردە ءتۇرلى فورماتتاعى مادەني جانە بۇقارالىق ءىس-شارالار ۇيىمداستىرىلادى.

قازاقستان حالقى اسسامبلەياسىنىڭ اقپاراتىنا سايكەس، بۇگىن مەرەكەگە وراي ەلورداداعى دوستىق ۇيىندە رەسپۋبليكالىق تەلەكوپىر وتكىزۋ جوسپارلانىپ وتىر. وعان ەلىمىزدەگى بارلىق دوستىق ۇيىنەن 400-دەن استام ادام قاتىسادى دەپ كۇتىلۋدە.

ودان بولەك، داستۇرگە ساي مەملەكەت باسشىسى وتانداستارىمىزدى العىس ايتۋ كۇنىمەن قۇتتىقتايدى.