بيىل استانا قالاسىنا 26 جىل بولدى.
بۇگىن، 6 شىلدەدە قازاقستاندىقتار ەل استاناسى – استانانىڭ 26 جىلدىعىن تويلاپ جاتىر، دەپ حابارلايدى Almaty-akshamy.kz
استانا عاجايىپ عيماراتتارىمەن، ەرەكشە كەلبەتىمەن، ەۋرازياداعى ساۋلەتتى قالالاردىڭ بىرىنە اينالدى. ەلوردا ءداستۇر مەن جاڭاشىلدىقتى ۇشتاستىرىپ، ەلىمىزدىڭ دامۋى مەن وركەندەۋىنىڭ جارقىن بەلگىسى اتانىپ، بۇكىل الەمگە تانىلدى.
مادەنيەت جانە اقپارات مينيسترلىگىنىڭ مالىمەتىنشە، وسى ۋاقىت ارالىعىندا ەلوردانىڭ تاريحى، مادەنيەتى مەن وزىندىك ءداستۇرى قالىپتاسىپ ۇلگەردى.
"استانا – اكىمشىلىك جانە ساياسي ورتالىق قانا ەمەس، قازاقستاننىڭ مادەني ءومىرى قايناپ جاتقان رۋحاني جۇرەگى. مۇندا الەمنىڭ تۇكپىر-تۇكپىرىنەن كەلگەن قوناقتاردىڭ قاتىسۋىمەن اۋقىمدى حالىقارالىق مادەني ءىس-شارالار، فەستيۆالدار، كورمەلەر مەن كونسەرتتەر وتەدى. ەلوردادا ءوتىپ جاتقان حالىقارالىق فورۋمدار مەن سەزدەر ونىڭ جاھاندىق ديالوگ پەن ىنتىماقتاستىقتىڭ ماڭىزدى ورتالىعى ەكەنىنىڭ ايقىن دالەلى"، دەلىنگەن ۆەدومستۆو قۇتتىقتاۋىندا.
اتالمىش كۇن ەلوردا تۇرعىندارى ءۇشىن عانا ەمەس، ءاربىر قازاقستاندىق ءۇشىن دە ەرەكشە مەرەكە.
"استانا – مەملەكەتىمىزدىڭ بەيبىت ءارى سىندارلى ساياساتىنىڭ، ەلىمىزدىڭ قارقىندى دامۋى مەن جارقىن بولاشاعىنىڭ، بۇكىل ەلدىڭ تاتۋلىعى مەن تۇتاستىعىنىڭ كورىنىسى. قارقىندى دامۋدىڭ، مادەني جانە جاڭاشىل باستالامالاردى قولداۋدىڭ ارقاسىندا استانا جاڭا قازاقستاننىڭ سيمۆولىنا اينالدى. بارشاڭىزدى استانا كۇنىمەن شىن جۇرەكتەن قۇتتىقتايمىز!"، دەلىنگەن ق ر مادەنيەت جانە اقپارات مينيسترلىگى باسپا ءسوز قىزمەتىنىڭ اقپاراتىندا.
ۇلتتىق ستاتيستيكا بيۋروسىنىڭ مالىمەتى بويىنشا، 1997 جىلى ەلوردا حالقى 287 201 ادام بولسا، 26 جىلدان كەيىن مۇنداعى تۇرعىندار سانى 1 430 117-گە جەتتى.