اباي كۇنى اياسىندا الماتىلىق «قازاقكونسەرت» ۇيىمىنىڭ سەمەيگە گاسترولى جوسپارلانعان.
ون كۇندىك شارا بۇگىن ساعات 15:00-دە اباي وبلىستىق نيەۆزوروۆتار وتباسى اتىنداعى بەينەلەۋ ونەرى مۇراجايىندا قوس مۋزەيدىڭ بىرلەسكەن «ۇلىلار ۇندەسكەندە» (ۆەرنيساج) كورمەسىمەن اشىلادى، دەپ حابارلايدى Almaty-akshamy.kz
8 تامىز كۇنى، ياعني دۇيسەنبى كۇنى، ساعات 15:00-دە اباي وبلىستىق نيەۆزوروۆتار وتباسى اتىنداعى بەينەلەۋ ونەرى مۇراجايىندا قوس مۋزەيدىڭ بىرلەسكەن «ۇلىلار ۇندەسكەندە» (ۆەرنيساج) كورمەسى اشىلادى.
9 تامىز كۇنى ساعات 10:00-دە وبلىستىق اباي اتىنداعى امبەباپ كىتاپحاناسىندا «بارلىق دانالىق كىتاپتا» اتتى ادەبي ەكسپوزيسيالار توپتاماسى وتەدى. وندا «اباي الەمى» بىرەگەي باسىلىمدار كىتاپحاناسى»، «قازاق دالاسىنىڭ ۇلى پەرزەنتى»، « عاسىرلار ۇندەستىگىندەگى رۋحاني مۇرا» توپتامالارى ۇسىنىلماق.
10 تامىزدا ساعات 11:30-دا «قازاقكونسەرت» مەملەكەتتىك كونسەرتتىك ۇيىمىنىڭ «ەل بىرلىگى – جاڭا قازاقستان» گاسترولدىك ساپارى سەمەيدە باستالادى. ابايدىڭ «جيدەباي-بورىلى» مەملەكەتتىك تاريحي-مادەني جانە ادەبي-مەموريالدىق قورىق-مۋزەيىندە مۇحتار اۋەزوۆتىڭ 125 جىلدىعىنا ارنالعان «اۋەزوۆ الەمى» اتتى دوڭگەلەك ۇستەل وتىرىسى وتەدى. سونداي-اق «قازاقكونسەرتتىڭ» شىعارماشىلىق ۇجىمى جەرگىلىكتى زيالى قاۋىم وكىلدەرىمەن كەزدەسەدى.
11 تامىزدا ساعات 17:00-دە اباي اتىنداعى قازاق مۋزىكالىق-دراما تەاترىندا «جاس اباي» (اۆتورى ت. يبراگيموۆ) قويىلىمى كورسەتىلەدى.
12 تامىزدا سەمەي وبلىستىق تاريحي-ولكەتانۋ مۋزەيىندە «ابايدىڭ اقىندىق مەكتەبى جانە ساپارعالي الىمبەتوۆ»، «تاڭىربەرگەن امىرەنوۆ – ابايدىڭ اقىندىق ءداستۇرىن جالعاستىرۋشى» دارىستەرى ءوتىپ، «سەمەي دەسە، اباي دەپ قارايدى ادام...» اتتى كورمە اشىلادى.
13 تامىزدا دوستويەۆسكيي اتىنداعى دراما تەاترىندا «قارا سوزدەر» پوەتيكالىق قويىلىمى كورسەتىلەدى.
14 تامىزدا نيەۆزوروۆتار وتباسى اتىنداعى بەينەلەۋ ونەرى مۇراجايىندا «ۇلىلار ۇندەسكەندە» كورمەسىنە ەكسكۋرسيا وتكىزىلەدى: ساعات 12:00-دە - قازاق تىلىندە، 14:00-دە - ورىس تىلىندە.
15 تامىزدا «داريعا-اي» جاستار تەاترى مۇحتار اۋەزوۆتىڭ «عاجايىپ تراگەدياسى» سپەكتاكلىن ساحنالايدى.
16 تامىزدا ف.م.دوستويەۆسكيي اتىنداعى ادەبي-مەموريالدىق مۇراجايدا اباي ءومىرى مەن شىعارماشىلىعىنا ارنالعان ءدارىس وتەدى.
سەمەيدەگى اباي كۇنىنە ارنالعان ءىس-شارالار لەگى 17 تامىزدا امىرە قاشاۋبايەۆ اتىنداعى مەملەكەتتىك فيلارمونيانىڭ «قالىڭ ەلىم، قازاعىم، قايران جۇرتىم» اتتى كونسەرتىمەن اياقتالادى.