2024 جىلدىڭ باسىندا رەسپۋبليكا جاستارىنىڭ سانى - 5 759 781 ادام. بۇل 14 پەن 35 جاس ارالىعىنداعى قازاقستاندىقتار.
جىل باسىنان بەرى 20 مىڭنان استام جاستار كاسىبي باعدار بەرۋ جۇمىستارىمەن قامتىلدى، 130 مىڭنان استامى جاستاردى قولداۋعا باعىتتالعان مەملەكەتتىك باعدارلامالار مەن باستامالاردىڭ باعىتتارى بويىنشا كونسۋلتاسيالىق كومەك الدى، دەپ حابارلايدى aqshamnews.kz ق ر مادەنيەت جانە اقپارات مينيسترلىگىنىڭ باسپا ءسوز قىزمەتىنە سىلتەمە جاساپ.
مەملەكەت باسشىسى ق. توقايەۆتىڭ تاپسىرماسى بويىنشا قازاقستان رەسپۋبليكاسىنىڭ 2023-2029 جىلدارعا ارنالعان مەملەكەتتىك جاستار ساياساتىنىڭ تۇجىرىمداماسىنا ءتيىستى وزگەرىستەر مەن تولىقتىرۋلار ەنگىزۋ بويىنشا جۇمىس جۇرگىزىلۋدە.
تۇرعىن ءۇي ماسەلەلەرىن شەشۋ ءۇشىن اعىمداعى جىلعى ناۋرىز ايىندا وتباسى بانكىمەن بىرلەسىپ، اۋديتورياسىنىڭ 60% - ى جاستاردى قامتىعان «9-20-25/وتاۋ» جاڭا يپوتەكالىق باعدارلاما ىسكە قوسىلدى. 1 مامىرداعى جاعداي بويىنشا جاس وتباسىلاردان 16 747 ءوتىنىش بەرىلدى.
سونىمەن قاتار 18 جاستان 35 جاسقا دەيىنگى جۇمىس ىستەيتىن جاستار ءۇشىن ەلىمىزدىڭ 16 وڭىرىندە جىلدىق كرەديت بويىنشا پايىزدىق مولشەرلەمەسى 5% ، باستاپقى جارناسى 10% جانە 25 جىلعا دەيىنگى مەرزىمى بەرىلگەن جەڭىلدەتىلگەن تۇرعىن ءۇي باعدارلامالارى ىسكە اسىرىلۋدا.
«جۇمىس ىستەپ جۇرگەن جاستارعا ساتىپ الۋ قۇقىعىنسىز جالعا بەرىلەتىن تۇرعىنجاي بەرۋ قاعيدالارىن بەكىتۋ تۋرالى» بۇيرىققا وزگەرىستەر ەنگىزىلدى. قاعيدادا جۇمىس ىستەيتىن جاستار ءۇشىن ساتىپ الۋ قۇقىعىنسىز جالعا بەرىلەتىن تۇرعىن ءۇي الۋ ءۇشىن جىل سايىنعى جيناقتاۋ شەگىن ەنگىزۋ كوزدەلەدى.
شىعارماشىلىق جانە بەلسەندى جاستاردى قولداۋعا قاتىستى «دارىن» مەملەكەتتىك سىيلىعىنىڭ قاعيدالارىنا تولىقتىرۋلار ەنگىزىلدى. بىرىنشىدەن، سىيلىقاقى مولشەرى 600 مىڭ تەڭگەدەن 1 ميلليون تەڭگەگە دەيىن ۇلعايتىلدى. ەكىنشىدەن، «قوعامدىق قىزمەت» جاڭا نوميناسياسى قوسىلدى.
جاستار ساياساتىنىڭ نەگىزگى باعىتتارى: جۇمىسسىزدىق، تۇرعىن ءۇي ماسەلەلەرىن شەشۋ، بيزنەس-باستامالاردى قولداۋ، سونداي-اق ءبىلىم مەن مادەنيەت دەڭگەيىن كوتەرۋ.
«Zhas project» جوباسى اياسىندا بيىل اۋىل جاستارى اراسىندا 280 گرانت ءبولىنىپ، بيزنەس-جوبالارىن ىسكە اسىرۋ ءۇشىن NEET ساناتى ىسكە اسىرىلۋدا.
جاستاردىڭ بيزنەس-باستامالارىن قولداۋ ءۇشىن «تاۋەلسىزدىك ۇرپاقتارى» جوباسىن ىسكە اسىرۋ جالعاسۋدا. 2024 جىلى 3 ملن تەڭگە كولەمىندە 30 گرانت ءبولۋ كوزدەلگەن. ۆولونتەرلىك سالانى قولداۋ ماقساتىندا قوسىمشا «ۆولونتەرلىك» باعىتى قاراستىرىلعان.