بۇدان بىلاي ساربازدى مىندەتتى تۇردە مەنينگيتكە تەكسەرەدى

قورعانىس ءمينيسترى رۋسلان جاقسىلىقوۆ اسكەرگە شاقىرىلعان ساربازدار مىندەتتى تۇردە مەنينگيتكە تەكسەرىلەتىنىن ايتتى، دەپ حابارلايدى Almaty-akshamy.kz.

بۇعان دەيىن جەتىسۋ وبلىسىندا اسكەرگە بارعانىنا 3-اق اي بولعان ساربازدىڭ كوز جۇمعانى حابارلانعان ەدى. ول مەنينگيت اۋرۋىنان كوز جۇمعان. مينيستر وسى جاعدايدان كەيىن ساربازداردىڭ دەنساۋلىعىن جەكە باقىلاۋىنا العانىن جەتكىزدى.

«ساربازدىڭ وتباسىنا كوڭىل ايتامىن. ول مەنينگيت اۋرۋىنان كوز جۇمدى... وكىنىشكە قاراي، مىندەتتى تۇردە تاپسىراتىن مەديسينالىق اناليزدەردىڭ تىزىمىندە مەنينگيتكە تەكسەرىلۋ جوق. ءقازىر ونى ءبىز تىزىمگە قوسۋ بويىنشا جۇمىس ىستەپ جاتىرمىز. وسى جاعدايدان كەيىن مەن ءتيىستى شەشىم قابىلدادىم، ءتيىستى قارجى ءبولىندى. ساربازدار اسكەري بولىمگە كەلگەننەن كەيىن ولاردى 100% مەنينگوكوكقا تەكسەرەمىز. ەگەر اۋرۋ انىقتالسا، ولار 5-7 كۇن بويى ءدارى ءىشىپ، ەمدەلەدى»، - دەدى رۋسلان جاقسىلىقوۆ پارلامەنتتىڭ بىرلەسكەن وتىرىسىنان سوڭ.

سونداي-اق ول اۋرۋدان كوز جۇمعان ساربازدىڭ اتا-اناسى دارىگەرلەر قويعان دياگنوزبەن كەلىسپەي وتىرعانىن اتاپ ءوتتى.

«مەن دە اكەمىن. ولاردى تۇسىنەمىن. مۇنداي جاعدايدىڭ بولعانى بارىمىزگە اۋىر ءتيدى. قازاقتا «اجالى كەلدى» دەگەن ءسوز بار. ساراپتاما (دارىگەرلەر قويعان دياگنوزدى) راستادى»، - دەدى مينيستر.