سوتتى بولعان جاسوسپىرىمدەر جازاسىن وتەپ جاتقان مەكەمەنىڭ ءتۇرلى مادەني، ادەبي، رۋحاني ءىس-شارالار وتەتىن زالى گۇلدەرمەن، اشىق ءتۇستى شارلارمەن، رۋحتى سوزدەر جازىلعان پلاكاتتارمەن بەزەندىرىلىپتى. بالالاردىڭ ءوزى جاساعان قابىرعا گازەتى دە ايتۋلى كۇننىڭ لەبىن سەزدىرەدى. مەرەكە شىمىلدىعى ەلىمىزدىڭ انۇرانىمەن اشىلدى.
كولونيادا تاربيەلەنىپ جاتقان جاستار ءوز كۇشتەرىمەن كونسەرت قويدى، سوعىس جىلدارىنداعى اندەردى شىرقادى، سوناۋ سۇراپىل جىلدارى جازىلعان ولەڭدەردى وقىدى. اسكەري تاقىرىپتاعى بەينەكليپتەردى تاماشالادى.
ءىس-شارا بارىسىندا ءبىر مينۋت ۇنسىزدىك جاريالانىپ، سوعىستان قايتپاي قالعان اتالارعا قۇرمەت كورسەتىلدى. ءار بالا تاريحتا قالعان ەسىمى بەلگىلى جاۋىنگەرلەردى اتاپ جاتقاندا، ءبىر تاربيەلەنۋشى سوعىستان ورالماعان ءوز اتاسىنىڭ ەسىمىن اتاعانى ءتىپتى اسەرلى شىقتى.
جاسوسپىرىمدەر سوسىن «جەڭىس كۇنى» ءانىن بىرگە شىرقادى.
«كەش سوڭىندا بالالار ۇلى وتان سوعىسىنىڭ العاشقى اۋىر جىلدارىنداعى قايعىلى وقيعالاردى باياندايتىن "برەست قامالى" ءفيلمىن ءبىر دەممەن وتىرىپ كورىپ شىقتى. دەمەك، ولارعا ويلى كارتينا وي سالدى دەپ ويلايمىن. ماقسات تا سول، اياعىن جازا باسىپ، ءىستى بولعان جاسوسپىرىمدەردى بەيبىت ءومىردىڭ ءقادىرىن بىلۋگە شاقىرۋ، ادامگەرشىلىك، قايىرىم، دوستىق، وتاندى ءسۇيۋ سىندى قاسيەتتەردى بويىنا ءسىڭىرۋ»، – دەيدى №11 مەكەمەنىڭ تاربيە ءىسى مامانى ەركەگۇل جەڭىسحان.