يسپانيادا 3750 ادام ىندەتكە شالدىققان
برازيليا مەن يسپانيا ۇكىمەتى ءوز اۋماعىندا مايمىل شەشەگىنەن قازا تاپقاندار تۋرالى العاشقى دەرەك تىركەلگەنىن مالىمدەدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
بۇعان دەيىن افريكا قۇرلىعىنان باسقا ەلدەردە اتالعان ۆيرۋس سالدارىنان ءولىم جاعدايى بولماعان.
ۆۆس اگەنتتىگىنىڭ مالىمەتىنشە، بۇگىندە برازيليادا 1066 ادامنىڭ ىندەت جۇقتىرعانى انىقتالعان.
سونىمەن قاتار، تاعى 513 تۇرعىن مايمىل شەشەگىن جۇقتىردى دەگەن كۇدىكپەن تىركەۋگە الىنىپتى. ال، اتالعان ۆيرۋستان 41 جاستاعى برازيليالىق كوز جۇمدى.
يسپانيادا 3750 ادام ىندەتتىڭ ىلمەگىنە ىلىنگەن. ونىڭ ىشىندە 120 تۇرعىن اۋرۋحانادا ەم الىپ جاتىر. قازىرگى تاڭدا يسپانيادا مايمىل شەشەگىنەن ەكى ادام قايتىس بولدى.
بۇرىن حابارلاعانىمىزداي، امەريكا قۇراما شتاتتارى مايمىل شەشەگىن جۇقتىرۋ بويىنشا كوش باستاپ تۇر.