ۆولونتەرلىك شتاب وبلىس تۇرعىندارىنان كيىم-كەشەك، تەز بۇزىلمايتىن تاعامدار، دارىلىك جانە جەكە گيگيەنالىق زاتتار جانە باسقا دا العاشقى كەرەك زاتتاردى قابىلداۋدى جالعاستىرۋدا
باتىس قازاقستان وبلىسىندا سۋ تاسقىنىنان زارداپ شەككەن تۇرعىندارعا كومەك كورسەتەتىن ۆولونتەرلىك شتاب قۇرىلدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
بقو ىشكى ساياسات باسقارماسى ءمالىم ەتكەنىندەي، شتابتى وبلىستىق جاستارمەن جۇمىس جونىندەگى رەسۋرستىق ورتالىعىنىڭ باسشىسى ادىلگەرەي زۇلحاروۆ باسقارادى.
شتاب ع.قاراش كوشەسى، 16 ءۇي مەكەنجايىنداعى وبلىستىق تەننيس ورتالىعىندا ورنالاسقان.
«قازىرگى تاڭدا قاراتوبە، جانىبەك، شىڭعىرلاۋ، ءبورلى اۋداندارىنىنىڭ ءارقايسىسىندا 30 ادامنان قۇرالعان ۆولونتەرلىك توپتار قىزمەت اتقارۋدا. ولار زارداپ شەككەن ايماقتاردى قالپىنا كەلتىرۋ جۇمىستارىنا جاردەم بەرۋدە. سونىمەن قاتار ورال قالاسىندا 100-دەن استام ۆولونتەر كومەك كورسەتۋگە دايىن. ۆولونتەرلىك شتاب وبلىس تۇرعىندارىنان كيىم-كەشەك، تەز بۇزىلمايتىن تاعامدار، دارىلىك جانە جەكە گيگيەنالىق زاتتار جانە باسقا دا العاشقى كەرەك زاتتاردى قابىلداۋدى جالعاستىرۋدا. جەتكىلىكتى دەڭگەيدە جينالعان سوڭ اتالعان ايماقتارعا جونەلتىلەدى. قوسىمشا سۇراقتار بويىنشا شتاب جەتەكشىسى ادىلگەرەي زۇلحاروۆقا، 8-708-704-77-78 تەلەفون نومىرىنە قوڭىراۋ شالۋعا بولادى»، - دەپ حابارلادى ۆەدومستۆودان.
«ورال قالاسىنداعى تەننيس ورتالىعىندا ورىن تەپكەن كومەك ورتالىعىندا تۇرعىداردان جينالعان ازىق-تۇلىك، باسقا دا زاتتاردى اۋداندارعا جونەلتەتىن بولامىز. اۋدانداردا ۆولونتەرلىك توپتار قازىرگى كەزدە كەزەكشىلىكتە ءجۇر. تج قىزمەتكەرلەرىمەن بىرگە سۋ تاسقىنى زارداپتارىن جويۋ جانە الدىن الۋ جۇمىستارىنا قاتىسۋدا. 2011 جىلعى كوكتەمگى سۋ تاسقىنى كەزىندە وسىنداي شتاب قۇرىلىپ، جۇمىس ىستەگەن بولاتىن»، - دەدى شتاب جەتەكشىسى ادىلگەرەي زۇلحاروۆ.
ەسكە سالا كەتەيىك، بۇدان بۇرىن باتىس قازاقستاندا 100-گە جۋىق تۇرعىن ءۇيدى سۋ باسقانىن، تاسقىن سۋ شايىپ كەتكەن سوڭ بىرنەشە كولىك جولى جابىلعانىن جازعان بولاتىنبىز.
سونداي-اق بقو-دا 2 جۇكتى ايەل سۋ باسقان اۋماقتان تىكۇشاقپەن ورالعا جەتكىزىلدى.
بقو-دا رەسپۋبليكالىق ماڭىزى بار تاعى ءبىر تراسسانى سۋ باستى.