پرەمەر-مينيستر ولجاس بەكتەنوۆتىڭ توراعالىعىمەن وتكەن ۇكىمەت وتىرىسىندا باتىس قازاقستان وبلىسىنىڭ اكىمى ناريمان تورەعالييەۆ وڭىردە زارداپ شەككەندەرگە وتەماقى تولەۋ جانە قالپىنا كەلتىرۋ جۇمىستارىنىڭ تولىق اياقتالعانى تۋرالى باياندادى.
جالپى سوماسى 3،6 ملرد تەڭگەگە 9 994 وتباسى ءبىرجولعى تولەم الدى. 10 222 وتباسىنا 3،7 ملرد تەڭگەگە ماتەريالدىق وتەماقى تولەندى. زارداپ شەككەن ۇيلەردى جوندەۋگە 4،3 ملرد تەڭگە باعىتتالدى، 42،3 ملرد تەڭگەگە 2015 پاتەر ساتىپ الىندى جانە 775 جاڭا تۇرعىن ءۇي سالىندى.
قۇرىلىس جۇمىستارىنا 60-تان استام جەرگىلىكتى كومپانيا مەن 2 مىڭعا جۋىق ادام جۇمىلدىرىلدى. سونىمەن قاتار سىرىم اۋدانىندا الدىندا جۇرگىزىلگەن تەحنيكالىق تەكسەرۋ ناتيجەسىندە جوندەۋگە جاتقىزىلعان ءبىرقاتار تۇرعىن ۇيلەردە ۋاقىت وتە كەلە ىرگەتاستارى شوگىپ، قابىرعالارىندا جارىقتار پايدا بولدى.
اكىم تۇرعىنداردىڭ وتىنىشتەرى نەگىزىندە قايتا تەحنيكالىق تەكسەرۋ جۇرگىزىلىپ، تاعى 38 جاڭا تۇرعىن ءۇي سالۋ تۋرالى شەشىم قابىلدانعانىن حابارلادى.
قۇرىلىس جۇمىستارى 3 قىركۇيەكتە باستالدى جانە بيىلعى 15 قازانعا دەيىن اياقتالادى. بۇدان بولەك، ورال قالاسىندا قايتالاما نارىقتا پاتەر ساتىپ الۋ بويىنشا جۇمىستاردى ۇيىمداستىرۋ بارىسىندا كوپبالالى وتباسىلاردان جەكە تۇرعىن ۇيلەر سالۋ بويىنشا وتىنىشتەر كەلىپ ءتۇستى. وسىعان بايلانىستى، قىسقا مەرزىمدە ورال قالاسىنىڭ دەركول كەنتىندە 28 قوسىمشا تۇرعىن ءۇيدىڭ قۇرىلىسى باستالدى. قۇرىلىس جۇمىستارى وسى جىلدىڭ 1 قازانىنا دەيىن اياقتالادى.
جالپى، وبلىس بويىنشا سۋ تاسقىنى سالدارىن قالپىنا كەلتىرۋگە بارلىق كوزدەردەن 100 ملرد تەڭگە باعىتتالدى.