الماتىدا دزيۋدودان جاسوسپىرىمدەر مەن جاستار اراسىندا ازيا كۋبوگى وتەدى
7-9 ءساۋىر كۇندەرى الماتى قالاسىنداعى بالۋان شولاق اتىنداعى سپورت سارايىندا بەكەت ماحمۇتوۆتى ەسكە الۋعا ارنالعان دزيۋدودان جاسوسپىرىمدەر مەن جاستار اراسىندا ازيا كۋبوگى وتەدى، دەپ حابارلايدى Almaty-akshamy.kz.
حالىقارالىق دزيۋدو فەدەراسياسىنىڭ كۇنتىزبەسىنە سايكەس وتكىزىلگەلى وتىرعان جارىسقا 2006-2007 جىلدارى دۇنيەگە كەلگەن جاسوسپىرىمدەر مەن 2003 -2005 جىلدارى تۋعان جاس تاتامي شەبەرلەرى قاتىسادى.
IJF ەرەجەسىنە سايكەس، ازيا كۋبوگىنىڭ جەڭىمپازدارىمەن جۇلدەگەرلەرىنە رەيتينگتىك ۇپاي قوسىلادى. جارىس جەڭىمپازدارىنا 100 ۇپايدان بەرىلسە، كۇمىس جۇلدەگەرگە 60، قولا جۇلدەگەرگە 40 ۇپايدان بەرىلەدى.
بيىل التىنشى رەت ۇيىمداستىرىلىپ وتىرعان ازيا كۋبوگىنە قازاقستان، وزبەكستان، تاجىكستان، قىرعىزستان، موڭعوليا، گونكونگ، تۇركىمەنستان، گرەسيا، گرۋزيا جانە اقش-تان - بارلىعى 400-دەن استام دزيۋدوشى قاتىسادى دەپ جوسپارلانعان.
ماحمۇتوۆ بەكەت ساپابەك ۇلى - 2009-2012 جىلدار ارالىعىندا قازاقستان دزيۋدو فەدەراسياسىنىڭ پرەزيدەنتى، سونداي-اق ازيا دزيۋدو وداعىنىڭ ۆيسە-پرەزيدەنتى قىزمەتىن اتقارعان. دزيۋدودان بەكەت ماحمۇتوۆ اتىنداعى تۋرنير 2017 جىلدان بەرى الماتى قالاسىندا ءداستۇرلى تۇردە وتكىزىلىپ كەلەدى.