اتالمىش اۋدان كوروناۆيرۋسقا قارسى ۆاكسينامەن تولىق قامتاماسىز ەتىلگەن.
الماتى قالاسى بوستاندىق اۋدانىنىڭ اكىمى التاي راحىمبەتوۆ وڭىرلىك كوممۋنيكاسيالار قىزمەتىندە وتكەن باسپا ءسوز كونفەرەنسياسىندا ەكپە ناۋقانىنىڭ بارىسى مەن Ashyq جوباسىنىڭ ارتىقشىلىقتارى تۋرالى ايتتى، دەپ حابارلايدى Almaty-akshamy.kz.
ونىڭ ايتۋىنشا، اۋداندا 217 مىڭ ادام ۆاكسينا الۋى ءتيىس، بۇگىندە 113 مىڭ ادام ەكپە الدى، بۇل 52%-دى قۇرادى.
التاي راحىمبەتوۆ بوستاندىق اۋدانى كوروناۆيرۋسقا قارسى ۆاكسينامەن تولىق قامتاماسىز ەتىلگەنىن ايتتى. ەكپە پۋنكتتەرى ەمحانالار بازاسىندا دا، تانىمال سوسو-دا دا بار. كاسىپكەرلەردىڭ باستاماسى بويىنشا بارلىق ۆاكسينالانعان ازاماتتارعا كەز كەلگەن تاۋاردى ساتىپ الۋعا 5-تەن 20%-عا دەيىن جەڭىلدىكتەر بەرىلەدى.
«كاسىپكەرلەر وزدەرىنىڭ نىساندارىنا ۆاكسينا العان ازاماتتار كەلگەن كەزدە قىزمەتكەرلەر جۇقتىرۋ قاۋپىنەن قورعالاتىنىن بىلەدى. وسىلايشا ولار حالىقتىڭ ۆاكسينا تۋرالى باستاماسىن قولدايدى. قالادا ەكپە پۋنكتتەرىنىڭ ءبىرى ورنالاسقان «مەگا سەنتر» سوسو باسشىلىعىنا حالىق اراسىندا اپتا سايىنعى ۇتىس ويىنىن وتكىزگەنى ءۇشىن العىسىمدى بىلدىرەمىن. تامىز ايىنىڭ سوڭىندا وسى ەكپە پۋنكتىندە ۆاكسينا العاندار اراسىندا باس جۇلدە – اۆتوكولىك ويناتىلادى. بوستاندىق اۋدانىنىڭ تۇرعىندارىن ۆاكسيناعا بەلسەندى قاتىسۋعا شاقىرامىن. ەگەر ءبىز تەزىرەك قالىپتى ومىرگە ورالعىمىز كەلسە، ۆاكسينانى كەيىنگە قالدىرمايىق»، – دەدى التاي راحىمبەتوۆ.
بوستاندىق اۋدانىنىڭ اكىمى Ashyq جوباسىنىڭ مۇمكىندىكتەرى تۋرالى ايتتى. ول قاۋىپسىزدىكتى قوسىمشانىڭ باستى ارتىقشىلىعى دەپ اتادى. قازىرگى ۋاقىتتا بيزنەس كوروناۆيرۋستىڭ جاڭا ءورشۋ قاۋپىنەن تۋىنداعان شەكتەۋلەرمەن جۇمىس ىستەۋگە ءماجبۇر. Ashyq ءموبيلدى قوسىمشاسى QR-كودتى پايدالانۋ جانە پتر ورتاق بازاسىمەن ينتەگراسيالاۋ ەسەبىنەن كەلۋشىنىڭ مارتەبەسىن انىقتاۋعا مۇمكىندىك بەرەدى. وسىلايشا، جوبانىڭ قاتىسۋشىسى بيزنەس سۋبەكتىسى ءقازىردىڭ وزىندە قابىلدانىپ جاتقان سانيتارلىق شارالار بويىنشا قوسىمشا باقىلاۋدى قامتاماسىز ەتەدى.
«اۋدانىمىزدىڭ كوپتەگەن كاسىپكەرلەرى جوباعا قاتىسۋعا قىزىعۋشىلىق تانىتىپ وتىر. الايدا، بۇل بەلگىلى ءبىر جاۋاپكەرشىلىكتى جۇكتەيدى، بارلىق كاسىپكەرلەر قوسىمشانىڭ جۇمىسىنا ادال قارامايدى. تەكسەرۋ كەزىندە مونيتورينگتىك توپتار كەلۋشىلەر ءوز مارتەبەسىن تەكسەرمەي، تىنىش كىرەتىن نىسانداردى انىقتايدى. وسى مۇمكىندىكتى پايدالانا وتىرىپ، كاسىپكەرلەرگە كەلۋشىلەردىڭ مارتەبەسىن سكانەرلەۋگە جاۋاپكەرشىلىكپەن قاراۋ كەرەكتىگىن ايتقىم كەلەدى. ورىندالماعان جاعدايدا ولاردى جوبادان الدىمەن ەكى اپتا مەرزىمگە، ال قايتالاپ بۇزعانى ءۇشىن ءبىرجولا شىعارۋعا بولادى»، – دەدى اۋدان اكىمى.
التاي راحىمبەتوۆ Ashyq جۇمىسىنا «مەگا سەنتر» سوسو مەن «فورۋم» ساۋدا ءۇيى قوسىلعانىن ايتتى.
ءسوزىنىڭ سوڭىندا بوستاندىق اۋدانىنىڭ اكىمى كوروناۆيرۋستىڭ جاڭا شتامدارى وتە ءقاۋىپتى ەكەنىن، سوندىقتان ەكپە سالدىرۋدى تاڭداۋ قاجەتتىگىن ايتتى.