بوستاندىق اۋدانىنداعى كوممۋنالدىق جەلىلەردىڭ جارتىسىنان كوبى توزعان

ينجەنەرلىك جەلىلەردىڭ جوعارى دەڭگەيدە توزۋى اۋدانداعى نەگىزگى ماسەلەنىڭ ءبىرى، ول 55%-دان اسادى.

بۇل تۋرالى قالا اكىمى ەربولات دوسايەۆ بوستاندىق اۋدانىنىڭ تۇرعىندارىمەن كەزدەسۋدە مالىمدەدى، دەپ حابارلايدى Almaty-akshany.kz.

جىل باسىنان بەرى ينجەنەرلىك جەلىلەردە 671 اپات بولدى. 

"وربيتا"، "الماگۇل" شاعىناۋداندارىندا، جاروكوۆ – ساتبايەۆ – نازاربايەۆ – ءال-فارابي، روزىباكييەۆ – مىڭبايەۆ – تىلەندييەۆ - تيميريازيەۆ كوشەلەرىنىڭ بولىگىندە جانە ەرمەنساي شاعىناۋدانىندا سۋمەن جانە جىلۋمەن قامتاماسىز ەتۋ بويىنشا اپاتتار ءجيى بولىپ تۇرادى.   

ماسەلەنى شەشۋ ءۇشىن نە ىستەلۋدە؟

قىركۇيەك ايىندا ەرعوجين، گاندي كوشەلەرىندەگى، «وربيتا-4» شاعىناۋدانىندا ۇزىندىعى 1،6 كم جىلۋ جەلىلەرى قايتا جاڭارتىلدى. بۇل 546 كوپ قاباتتى تۇرعىن ۇيگە، 20 ءبىلىم بەرۋ مەكەمەسىنە جانە 12 دەنساۋلىق ساقتاۋ نىسانىنا ۇزدىكسىز جىلۋ بەرۋدى قامتاماسىز ەتەدى.

جەلتوقسان ايىندا «الماگۇل» قوسالقى ستانسياسى ءۇشىن 4،8 كم ەلەكترمەن قامتۋ كابەلدىك جەلىسىنىڭ قۇرىلىسى اياقتالادى. ءقازىر شامامەن 3 كم تارتىلدى. بۇل 200 مىڭ تۇتىنۋشىعا جانە 11 ءبىلىم بەرۋ نىسانىن ەلەكتر ەنەرگياسىمەن ۇزدىكسىز قامتاماسىز ەتەدى.

تامىز ايىندا «سۆەجەست» باۋ-باقشا سەرىكتەستىگىنىڭ 1،1 كم ەلەكتر جەلىسى مەن ترانسفورماتورلىق قوسالقى ستانسياسى «اجك» اق بالانسىنا بەرىلدى، سونىمەن قاتار «كومفورت سيتي» تك ينجەنەرلىك جەلىلەر تارتىلعان سوڭ، قوجابەكوۆ كوشەسىندەگى اسفالت جابىنى قالپىنا كەلتىرىلدى. 

قىركۇيەك ايىندا 83 كوشەگە 751 تىرەك ورناتىلىپ، ۇزىندىعى 22،5 كم كوشە جارىعىن جۇرگىزۋ باستالدى، بۇل جۇمىس جەلتوقساندا اياقتالادى. 7 كوشەدەگى جارىقتى جاڭارتۋ جۇمىستارى جۇرگىزىلۋدە، ول جەلتوقسان ايىندا بىتەدى.