بوستاندىق اۋدانىندا مەكتەپتەردەگى ورىن تاپشىلىعىن ازايتۋ ماسەلەسى قولعا الىنعان

وقۋ جىلى باستالعانشا اۋداندا مەكتەپ وقۋشىلارى ءۇشىن جاڭا كورپۋس پايدالانۋعا بەرىلەدى.

بۇل تۋرالى قالا اكىمى ەربولات دوسايەۆ بوستاندىق اۋدانىنىڭ تۇرعىندارىمەن وتكەن كەزدەسۋدە ايتتى، دەپ حابارلايدى Almaty-akshamy.kz.

مەكتەپتەردە ورىن تاپشىلىعىن ازايتۋ ءۇشىن ماۋسىم ايىندا №146 ليسەي مەن №191 مەكتەپكە 300 ورىندىق ەكى قوسىمشا كورپۋس سالىنىپ ءبىتتى.

1 قىركۇيەككە دەيىن №125 مەكتەپتىڭ 275 ورىندىق جاڭا كورپۋسىن پايدالانۋعا بەرۋ جوسپارلانۋدا.

بۇدان باسقا، قالا اكىمدىگى «ادىلەت» كوللەدجى ورنالاسقان 600 ورىندىق №94 مەكتەپتىڭ ءبىر بولىگىن ساتىپ الدى. جىل سوڭىنا دەيىن بالالار تولىققاندى مەكتەپتە وقۋعا كىرىسەدى.

سونداي-اق، كەلەسى جاڭا وقۋ جىلىنىڭ باسىندا №9 مەكتەپ-ينتەرناتىنىڭ اسحاناسى مەن 120 ورىندىق جاڭا كورپۋسىن اياقتاۋ جوسپارلانعان بولاتىن. قۇرىلىس ماتەريالدارى مەن قىزمەتتەردىڭ قىمباتتاۋىنا بايلانىستى شامامەن 200 ملن.تەڭگەگە جوبالاۋ-سمەتالىق قۇجاتتاماسىنا تۇزەتۋ ەنگىزىلۋدە. قىركۇيەك ايىنىڭ باسىندا ساراپتامادان وتكەننەن كەيىن قوسىمشا قاراجات بولىنەدى. وسىعان بايلانىستى قۇرىلىس-مونتاجداۋ جۇمىستارىن اياقتاۋ مەرزىمى 2022 جىلعى 30 قاراشاعا دەيىن ۇزارتىلدى.