جەر كودەكسىنە ەنگىزىلگەن وزگەرىس بويىنشا جەرگىلىكتى اتقارۋشى ورگاندارعا جاڭا مىندەت جۇكتەلدى، دەپ حابارلايدى Almaty-akshamy.kz. قازاقپاراتقا سىلتەمە جاساپ.
جوعارى اۋديتورلىق پالاتا باسپا ءسوز قىزمەتىنىڭ مالىمەتىنشە، 2021 جىلعى ماۋسىمدا جەر رەسۋرستارىنىڭ ۇتىمدى باسقارىلۋىن، پايدالانىلۋىن جانە قورعالۋىن قامتاماسىز ەتۋ، سونداي-اق گەودەزيا جانە كارتوگرافيا سالاسىنداعى جەر رەسۋرستارىنىڭ باسقارىلۋ تيىمدىلىگىنە مەملەكەتتىك اۋديت جۇرگىزىلگەن.
ونىڭ بارىسىندا جەر كودەكسىندە جەرگىلىكتى اتقارۋشى ورگاندارعا بوس جاتقان جەر تەلىمدەرى تۋرالى اقپاراتتى جاريالاۋ تالاپتارىنىڭ جوقتىعى انىقتالعان.
وسىعان بايلانىستى ق ر ۇكىمەتىنە جەر كودەكسىندەگى ولقىلىقتاردى جويۋ ماسەلەسىن قاراۋ تۋرالى ۇسىنىم بەرىلدى.
وسىلايشا جەر كودەكسىنىڭ 43-بابىنىڭ 1-1-تارماعىنا وزگەرىستەر ەنگىزىلدى.
وعان سايكەس جەرگىلىكتى اتقارۋشى ورگاندار بوس جەر ۋچاسكەلەرى مەن جوسپارلانىپ وتىرعان ساۋدا-ساتتىق جونىندەگى اقپاراتتى مەملەكەتتىك مۇلىك ءتىزىلىمىنىڭ ۆەب-پورتالىندا، وزدەرىنىڭ ينتەرنەت-رەسۋرسىندا جانە حالىققا قولجەتىمدى جەرلەردەگى ارناۋلى اقپاراتتىق ستەندتە دەرەكتەردى توقسان سايىن جاڭارتىپ وتىرۋ كەزەڭدىلىگىمەن جاريالاۋعا مىندەتتى.