سالتاناتتى شاراعا ءماجىلىس ءتوراعاسى ەرلان قوشانوۆ پەن تۇركيا ۇلتتىق ءماجىلىسىنىڭ باسشىسى مۇستافا شەنتوپ قاتىستى.
14 مىڭ شارشى مەتر بولاتىن وتباسىلىق ساياباقتىڭ اشىلۋى تۇركيانىڭ 100 جىلدىعىمەن تۇسپا-تۇس كەلىپ وتىر، دەپ حابارلايدى Almaty-akshamy.kz Qazaqstan.tv-عا سىلتەمە جاساپ.
ءماجىلىس ءتوراعاسى بارشا تۇرىك حالقىن وسى مەرەيلى مەرەكەمەن قۇتتىقتاپ، باق-بەرەكە تىلەدى. جاڭا ساياباق مادەنيەتى مەن تاريحى ورتاق ەكى ەلدىڭ ىنتىماعىنىڭ سيمۆولى ەكەنىن اتاپ ءوتتى. مۇندا تۇركى جۇرتىنا ورتاق كۇلتەگىن، بىلگە قاعان، تونىكوك جازبا ەسكەرتكىشتەرىنىڭ كوشىرمەلەرىمەن قاتار قازاقتىڭ ۇلى اقىنى اباي قۇنانباي ۇلىنىڭ ءمۇسىنى مەن عۇلاما عالىم ءال-فارابيدىڭ ەسكەرتكىشتەرى دە ورناتىلعان.
«كۇننەن كۇنگە، جىلدان جىلعا ءبىزدىڭ دوستىعىمىز نىعايىپ كەلە جاتىر. ونىڭ نىعايۋىنا ۇلكەن ىقپال ەتىپ وتىرعان ءبىزدىڭ مەملەكەتتەرىمىزدىڭ باسشىلارى قاسىم-جومارت توقايەۆ پەن رەجەپ تاييپ ەردوعان مىرزالار. بىزدە قازاقتا ايتادى «اعاش تامىرىمەن مىقتى، ادام دوستارىمەن مىقتى» دەگەن ءسوز بار. سىزدەر سياقتى دوستارىمىزبەن مىقتىمىز. سول دوستىقتىڭ ءبىر كورىنىسى مىنا ساياباقتىڭ اشىلۋى»، - دەيدى ق ر پارلامەنتى ءماجىلىسىنىڭ ءتوراعاسى ەرلان قوشانوۆ.
ساپار بارىسىندا ءماجىلىس ءتوراعاسى ەرلان قوشانوۆ تۇركيالىق ارىپتەسى مۇستافا شەنتوپپەن ەكىجاقتى كەزدەسۋ وتكىزدى. الدىمەن تۇركيادا بولعان جويقىن جەر سىلكىنىسى قازاق حالقىنىڭ قابىرعاسىن قايىستىرعانىنا توقتالىپ، كوڭىل ايتتى. پرەزيدەنت قاسىم-جومارت توقايەۆتىڭ تاپسىرماسىمەن جەر سىلكىنگەن وبلىستاردا الەۋمەتتىك عيماراتتاردىڭ قۇرىلىسى جوسپارلانىپ وتىرعانىن اتاپ ءوتتى. كەزدەسۋ سوڭىندا تاراپتار ىنتىماقتاستىق تۋرالى حاتتاماعا قول قويدى.