استانادا سوت ءابىلحان بورانبايەۆ (قايرات بورانبايەۆتىڭ نەمەرە ءىنىسى) پەن داۋرەن قازبەككە سىبايلاس جەمقورلىق قىلمىسى ءۇشىن ۇكىم شىعاردى. بۇل تۋرالى 2023 جىلدىڭ 26 قازانىندا ەلوردانىڭ قىلمىستىق ىستەر جونىندەگى اۋدانارالىق سوتىندا ءمالىم بولدى.
قىلمىستىق ءىستى استانا قالاسىنىڭ قىلمىستىق ىستەر جونىندەگى اۋدانارالىق سوتىنىڭ سۋدياسى باعلان ىدىرىسوۆ قارادى.
سوتتا بورانبايەۆ اعا جەدەل ۋاكىلى داۋرەن قازبەك پەن ش.-عا (تەرگەۋ كەزىندە قايتىس بولۋىنا بايلانىستى ءىس توقتاتىلدى) جالپى سوماسى 1،6 ملن تەڭگەدەن استام پارا بەرگەنى انىقتالدى.
قازبەك جانە ش. ادامدار توبىندا الدىن الا ءسوز بايلاسۋ ارقىلى پارا الىپ، قاماۋعا الىنعان بورانبايەۆقا ءموبيلدى بايلانىس، كەزدەسۋلەر، تۋعان كۇنىن الكوگولدى ىشىمدىكتەردى قولدانۋ ارقىلى تويلاۋ ءۇشىن باسقا ادامدارمەن بايلانىسقا تۇسۋىنە زاڭسىز مۇمكىندىك بەرگەن.
پروكۋرور بورانبايەۆتى 4 جىل 6 اي مەرزىمگە، ال سوتتالۋشىعا قازبەكتى 7 جىل مەرزىمگە باس بوستاندىعىنان ايىرۋ جازاسىن تاعايىنداۋدى سۇرادى. قورعاۋشى تاراپ ەكى سوتتالۋشىعا ايىپپۇل تۇرىندە جازا تاعايىنداۋدى سۇرادى.
سوت ءابىلحان بورانبايەۆتىڭ 4 جاس بالاسىنىڭ بولۋىن، كىناسىن مويىنداۋىن، وكىنۋىن، قىلمىستىق قۇقىق بۇزۋشىلىقتى اشۋعا جانە قىلمىستىق قۇقىق بۇزۋشىلىقتىڭ باسقا دا قاتىسۋشىلارىن اشكەرەلەۋگە بەلسەندى ىقپال ەتكەنىن، ال داۋرەن قازبەكتىڭ 3 جاس بالاسىنىڭ بولۋىن، كىناسىن مويىنداۋىن جانە وكىنۋىن قىلمىستىق جاۋاپتىلىق پەن جازانى جەڭىلدەتەتىن ءمان-جايلار رەتىندە تانىدى، - دەلىنگەن استانا سوتى تاراتقان اقپاراتتا.
سوت ۇكىمىمەن ءابىلحان بورانبايەۆ مەملەكەتتىك قىزمەتتە جانە كۆازيمەملەكەتتىك سەكتوردا لاۋازىمداردى اتقارۋ قۇقىعىنان ءومىر بويىنا ايىرىلىپ، 4 جىل 6 ايعا باس بوستاندىعىنان ايىرىلدى.
داۋرەن قازبەك مەملەكەتتىك قىزمەتتە جانە كۆازيمەملەكەتتىك سەكتوردا قىزمەت اتقارۋ قۇقىعىنان ءومىر بويىنا ايىرىلىپ، 7 جىلعا سوتتالدى.
ۇكىم زاڭدى كۇشىنە ەنگەن جوق.