الماتىدا سۋ قۇبىرى جەلىلەرىن سالۋدى اياقتاۋ ءۇشىن 28 قازاننان 30 قازانعا دەيىن بورالداي تاس جولىندا قوزعالىس شەكتەلەدى
الاتاۋ اۋدانىندا بارىس كوشەسىنەن جاۋجۇرەك كوشەسىنە دەيىن ەكى جاققا دا كولىك قوزعالىسى شەكتەلەدى، دەپ حابارلايدى almaty-akshamy.kz https://t.me/AlmatyJoly/325 سىلتەمە جاساپ.
اسفالتبەتون جابىنىن قالپىنا كەلتىرۋ كەزىندە قاۋىپسىزدىكتى قامتاماسىز ەتۋ ءۇشىن ۋاقىتشا شەكتەۋ ەنگىزىلەدى. وسىلايشا، 3،8 كم سۋ قۇبىرى جەلىلەرىن جانە 4،6 كم كارىز جەلىلەرىن سالۋ اياقتالادى. بۇل الاتاۋ اۋدانىنىڭ 2،5 مىڭ تۇرعىنىن قامتيدى، ولار ۇزدىكسىز ورتالىق سۋمەن جابدىقتاۋعا قوسىلادى. ال بۇرىن ولار جەكە كومپانيانىڭ قىزمەتىن پايدالانعان.
ۋاقىتشا قولايسىزدىققا تۇسىنىستىكپەن قاراۋدى جانە كورسەتىلگەن ۋچاسكەنى اينالىپ ءوتۋ جولدارىن الدىن الا قاراستىرۋدى سۇرايمىز. (اۆتوبۋس مارشرۋتتارى №10، №124، №81).
الماتى قالاسى ەنەرگەتيكا جانە سۋمەن جابدىقتاۋ باسقارماسىنىڭ مالىمەتىنشە، بيىل 20 نىسان بويىنشا 108،4 كم سۋ قۇبىرى جانە كارىز جەلىلەرىن (81،1 كم سۋ قۇبىرى جانە 27،3 كم كارىز) سالۋ جوسپارلانعان، بۇل حالىقتىڭ ورتالىقتاندىرىلعان سۋمەن جابدىقتاۋعا قولجەتىمدىلىگىن 99،2%-عا دەيىن ارتتىرۋعا مۇمكىندىك بەرەدى.
ەستەرىڭىزگە سالا كەتەيىك، جەلىلەردى سالۋ جانە جاڭعىرتۋ جۇمىستارى تۇراقتى نەگىزدە جۇرگىزىلۋدە، سەبەبى بۇل قالا تۇرعىندارىنىڭ ءومىر ءسۇرۋ ساپاسىنا تىكەلەي اسەر ەتەدى. ماسەلەن، بىلتىر ناۋرىزباي، الاتاۋ جانە تۇركسىب اۋداندارىنىڭ 18 شاعىن اۋدانى بويىنشا 153،9 كم سۋمەن جابدىقتاۋ جانە 118،3 كم سۋ بۇرۋ جەلىلەرى سالىندى (60 مىڭعا جۋىق ادام قامتىلدى). جۇرگىزىلىپ جاتقان جۇمىستىڭ ارقاسىندا سۋمەن قامتۋ جەلىلەرىنىڭ توزۋى 56،2%-دان 55،8%-عا جانە كارىز جەلىسىنىڭ توزۋى 58%-دان 57،5%-عا دەيىن تومەندەدى.