كەشە الەمدە حالىقارالىق ەسكەرتكىشتەر مەن تاريحي ورىنداردى قورعاۋ كۇنى اتاپ ءوتىلدى. دۇنيەجۇزىلىك مۇرا كۇنى دەپ تە اتالاتىن بۇل كۇندى 1983 جىلى يۋنەسكو-نىڭ ەسكەرتكىشتەر مەن كورىكتى جەرلەردى قورعاۋ جونىندەگى حالىقارالىق كەڭەستىڭ (ICOMOS) اسسامبلەياسى بەلگىلەدى. ول بۇكىلالەمدىك مادەني مۇرانى قورعاۋ جانە ساقتاۋ ماسەلەلەرىنە جۇرتشىلىقتىڭ نازارىن اۋدارۋ ماقساتىندا قۇرىلعان.
«الماتى – ءبىزدىڭ ورتاق ءۇيىمىز» ەكولوگيالىق اكسياسى اياسىندا حالىقارالىق ەسكەرتكىشتەر مەن تاريحي ورىندار كۇنىنە وراي، «بورالداي ساق قورعاندارى» ارحەولوگيالىق پاركىنىڭ اۋماعىنا دا 100 ءتۇپ اعاش وتىرعىزىلدى.
«قالامىزدا بۇگىنگى كۇنى مەملەكەتتىڭ قورعاۋىنا الىنعان 161 تاريحي جانە مادەني قۇندىلىعى بار ەسكەرتكىش ورنالاسقان. ونىڭ ىشىنە ارحەولوگيالىق، ارحيتەكتۋرالىق، مونۋمەنتالدى ونەر ەسكەرتكىشتەرى كىرەدى. بۇگىن سولاردىڭ ءبىرى ءارى بىرەگەيى "بورالداي ساق قورعاندارىندا" الماتى قالاسى مۋزەيلەر بىرلەستىگى ۇجىمى ارحەولوگيالىق پارك اۋماعىندا تازالىق جانە كوگالداندىرۋ جۇمىستارىن جۇرگىزدى. قالامىزدىڭ تازالىعى، ەڭ ءبىرىنشى قالا تۇرعىندارى ءۇشىن كەرەك. ءار ازاماتىمىز جانە وسكەلەڭ ۇرپاق تاريحىمىزدى ءبىلۋ كەرەك. تاريحىمىزدى بىلسەك، ءبىزدىڭ بولاشاعىمىز جارقىن بولادى. ءاربىر ۇلتتىڭ بولمىسىن اشاتىن، سول ۇلتتىڭ مادەنيەتى، ءسالت-داستۇرى جانە ادەت-عۇرىپى. تاريحىمىزدى ءبىلىپ، ءسالت-داستۇرىمىزدى قۇرمەتتەيىك»، – دەيدى الماتى قالاسى مۋزەيلەر بىرلەستىگىنىڭ ديرەكتورى ءلاززات ساعىندىقوۆا.
تابيعاتتى ايالاۋ اكسياسىنا الماتىلىق وقۋشىلارمەن، ستۋدەنتتەرمەن، مۋزەيلەر قىزمەتكەرلەرىمەن بىرگە اكتريسا، «توميريس» ءفيلمىنىڭ باستى كەيىپكەرى الميرا تۇرسىن، تانىمال بلوگەرلەر يۆان چەرۆينسكيي مەن نۇرقوجا ەرسايىن قاتىستى.
