ونەردى سۇيەتىن، وتكەندى قادىرلەي بىلەتىن ۇرپاق جاماندىقتان اۋلاق بولىپ، جاقسىلىق اتاۋلىعا جاقىن جۇرەتىنى ءسوزسىز.
تۇركسىب اۋدانىنداعى №59 مەكتەپ-گيمنازيانىڭ وقۋشىلارى مۇعالىمدەرىمەن بىرگە بيىل 120 جىلدىق مەرەيتويى اتالىپ ءوتىپ جاتقان سۋرەتشى ءابىلحان قاستەيەۆ ەسىمىن يلەنگەن ق ر مەملەكەتتىك ونەر مۋزەيىندە بولدى.
«مۋزەيدى بەتكە الىپ كەلە جاتقاندا بالالاردىڭ اۆتوبۋس ءىشىن جاستىققا ءتان شات كۇلكىگە بولەپ، تەزىرەك جەتسەك ەكەن دەپ ىنتىققانى قۋانتتى. جۇرەگى نازىك، ادەمىلىكتى كورۋگە اسىق شاكىرت تاربيەلەپ جاتقانىمىزعا قۋاندىم»، – دەيدى مەكتەپ-گيمنازيانىڭ قازاق ءتىلى مەن ادەبيەتى ءپانى ءمۇعالىمى ارايلىم تۇرعازى.
ال ونەر عيماراتىنىڭ تابالدىرىعىن اتتاعاننان-اق وقۋشىلاردىڭ كوزى جانىپ، ءار كارتيناعا ۇڭىلە، سىر ىزدەپ، ءتىپتى، بىر-بىرىمەن تالقىلاپ جاتتى. مۋزەي قىزمەتكەرى گۇلنۇر الپىسباي قىزى بالالاردى حالىق سۋرەتشىسى ءابىلحان قاستەيەۆتىڭ ءومىر جولىمەن، بىرەگەي تۋىندىلارىنىڭ تاريحىمەن تانىستىردى.
مۋزەيدە ءا.قاستەيەۆتىڭ 300-دەن استام كەسكىندەمەلىك جانە گرافيكالىق تۋىندىسى بار. وقۋشىلار قىلقالام شەبەرىنىڭ كارتينالارى ارقىلى قازاقتىڭ ءداستۇرلى ءومىر ءسۇرۋ سالتىمەن، تىنىس-تىرشىلىگىمەن، وتباسى قۇندىلىقتارىمەن تانىستى.
«ءابىلحان قاستەيەۆتىڭ پورترەت جانرىنىڭ ناعىز شەبەرى ەكەنىنە كوز جەتكىزدىك. قازاقتىڭ ۇلى اقىنى ابايدىڭ بەينەسىن كورگەندە، سۋرەتشىنىڭ تۇلعانىڭ جان دۇنيەسىنە تەرەڭ ۇڭىلە بىلگەنىن سەزىنگەندەي بولدىق. سۋرەتشى جاساعان تۋعان ولكەنىڭ بەينەلەرىنەن ەپيكالىق ۇلىلىقتى، پانورامالىق كەڭدىكتى، ليريكالىق كۇشتى سەزىندىك دەسەك تە بولادى. ءبىز تاعى دا ورالامىز. بۇل – بالالاردىڭ تىلەگى»، – دەيدى №59 مەكتەپ-گيمنازياسىنىڭ قازاق ءتىلى مەن ادەبيەتى ءپانى ءمۇعالىمى گۇلجان وسپانوۆا.
بالالاردىڭ مۋزەيگە جاساعان بۇل ەكسكۋرسياسى اتالعان ءبىلىم ورداسىنداعى قازاق ءتىلى مەن ادەبيەتى پاندەرى كافەدراسىنىڭ «ۇلت رۋحانياتىنداعى دارا تۇلعالار» اتتى ونكۇندىك اياسىندا «مەرەيتويلار كەرۋەنى» باعىتى بويىنشا ۇيىمداستىرىلدى.