بولشەكتەپ اكەلىنىپ، ەلدە قۇراستىرىلعان كولىكتەر زاڭداستىرىلۋى مۇمكىن

قازاقستانعا بولشەكتەپ اكەلىنىپ، قۇراستىرىلعان كولىكتەردى زاڭداستىرۋعا رۇقسات بەرىلۋى مۇمكىن.

بۇل تۋرالى اكىمشىلىك پوليسيا كوميتەتى «اشىق» نقا پورتالىندا جاريالاعان ۇكىمەت قاۋلىسىندا كورسەتىلگەن، دەپ حابارلايدى Almaty-akshamy.kz قازاقپاراتقا سىلتەمە جاساپ.

قۇجاتتا كورسەتىلگەندەي، كولىكتىڭ كەدەندىك تازارتۋدان وتكەنى تۋرالى مالىمەتى جوق جانە ىزدەۋدە بولماسا، ونىڭ باستاپقى مەملەكەتتىك تىركەلگەنى ءۇشىن 200 000 تەڭگە مولشەرىندە الىم مولشەرلەمەسىمەن مەملەكەتتىك تىركەۋگە جول بەرىلەدى.

ول ءۇشىن ازاماتتاردان مىنا قۇجاتتار سۇرالادى:

- ءوتىنىش بەرۋشىنىڭ كولىك قۇرالىن ساتىپ الۋ ءمان-جايلارى كورسەتىلەتىن ءوتىنىشى؛

- ىشكى ىستەر ورگاندارىنىڭ ۋاكىلەتتى قىزمەتكەرى بەرگەن كولىك قۇرالىن قاراپ تەكسەرۋ اكتىسى؛

- تەحنيكالىق بايقاۋدىڭ دياگنوستيكالىق كارتاسى.

قاۋلى جوباسىنا قوسىمشا بەرىلگەن تۇسىندىرمەدە مۇنداي وزگەرىس قازاقستان اۋماعىنا بولشەكتەپ اكەلىنىپ، ەلدە قۇراستىرىلعان كولىكتەردى زاڭداستىرۋعا ارنالعانى ايتىلعان.

«بۇل قوسالقى بولشەكتەردىڭ تۇرلەرى بويىنشا اكەلىنگەن جانە قازاقستان ازاماتتارىنا وتكىزىلگەن اۆتوموبيلدەردى زاڭداستىرۋ ءۇشىن قاراستىرىلىپ وتىر. كولىك قۇرالدارى ق ر اۋماعىندا عانا پايدالانۋعا جاتادى. مۇنداي كولىك قۇرالدارىنا قاتىستى مەنشىك قۇقىعىن وزگەرتۋگە جول بەرىلمەيدى. مۇنداي كولىك قۇرالىن تىركەۋ تۋرالى كۋالىكتە مەنشىك قۇقىعىن وزگەرتۋگە تىيىم سالۋ تەك ق ر اۋماعىندا پايدالانۋعا رۇقسات ەتىلەدى»، - دەلىنگەن قاۋلىدا.

قۇجات 24 ناۋرىزعا دەيىن كوپشىلىك تالقىلاۋدا بولادى.

ەسكە سالايىق، بۇعان دەيىن ب ا ق وكىلدەرىنىڭ ساۋالىنا جاۋاپ بەرگەن اكىمشىلىك پوليسيا كوميتەتى ءتوراعاسىنىڭ مىندەتىن اتقارۋشى قايسار سۇلتانبايەۆ «كونسترۋكتور» كولىكتەردىڭ زاڭداستىرىلمايتىنىن ايتقان ەدى.