№ 202 مەكتەپ-گيمنازيا ۇجىمى مەن وقۋشىلارى، سونداي-اق ولاردىڭ اتا-انالارى ع.مۇسىرەپوۆ اتىنداعى قازاق مەملەكەتتىك اكادەميالىق بالالالار مەن جاسوسپىرىمدەر تەاترىندا مەملەكەتتىك «دارىن» سىيلىعىنىڭ يەگەرى، اقىن، جازۋشى اقبەرەن ەلگەزەكتىڭ «بولماعان بالالىق شاق» تۋىندىسىنىڭ ساحنالاندىرىلعان قويىلىمىن تاماشالادى.
بۇل شارانىڭ الدىندا مەكتەپتە ءداستۇرلى تۇردە وتەتىن «كىتاپ وقۋ» بايقاۋىنا (مۇعالىمدەر، وقۋشىلار، اتا-انالار اراسىندا وتەتىن جارىس) اتالعان تۋىندى تاڭداپ الىنعان بولاتىن. وسى شارانىڭ باسى-قاسىندا جۇرگەن گيمنازيا باسشىسى الدىمەن شاكىرتتەرىنىڭ شىعارمانى وقىپ، تالداپ، تۇيسىنۋىنە قاجەتتىلىكتى قاپەرگە الىپ، تەاترلىق قويىلىمدى دا كورگەن ءجون دەپ شەشكەن ەدى. تەاتر زالىن ءبىلىم ۇجىمىنىڭ 500-گە جۋىق كورەرمەنى تولتىرىپ تاستادى.
قويىلىم باستالار الدىندا مەكتەپ باسشىسى بولات جانايحان ۇلى تۋىندى اۆتورىمەن تانىستىرىپ، شىعارمانىڭ بۇگىنگى قوعامداعى وزەكتى ماسەلەنى كوتەرگەنىنە توقتالدى. اتا-انا مەن بالا اراسىنداعى قارىم-قاتىناس، بالالىق شاقتىڭ باقىتى جايىندا ءسوز قوزعاپ، جاس كورەرمەندەردىڭ رۋحاني ازىق الۋىنا تىلەگىن قوستى. قويىلىمعا اۆتوردىڭ ارنايى كەلىپ، بىرگە كورۋى كورەرمەن قاۋىمعا ەرەكشە اسەر بەردى.
ساحناداعى اقوشتىڭ تاعدىرى... مەنىڭشە، جاس كورەرمەننىڭ كوبى ءومىر جايلى، ونىڭ قۇندىلىعى تۋراسىندا تولقىپ وتىرعانداي كورىندى. ال، ەرەسەكتەر ءبىرازى وتكەن كۇندەرىن ەسكە الىپ، كوز جاسىنا ەرىك بەرگەندەي مە دەرسىڭ. راسى سول، ساحناداعى كەيىپكەرلەردىڭ شىنايىلىعىنا باسىمدىق بەرگەن اكتەرلەر جاس كورەرمەن جۇرەگىنە جول تاپتى دەپ بىلەمىن. شەبەرلىك دەگەن وسى. «سوڭى نەمەن بىتەر ەكەن؟..» دەگەن ساۋال سانالى كورەرمەننىڭ ويىن جانارىنان وقىتقانداي. 
اناسىنا دەگەن ماڭگىلىك ساعىنىشىن ايتقان ساحناداعى اقوشتىڭ ءۇنى ءار بالانىڭ جۇرەگىنە جەتتى، بىلەم. قويىلىم سوڭىندا كورەرمەندەر ورىندارىنان تۇرىپ، ۇزاق قوشەمەت كورسەتتى. اقبەرەن ەلگەزەك ساحناعا شىققان ساتتە وقۋشىلار ءدۇر سىلكىندى. مىناداي قيىن تاعدىرعا مويىماي، اكە ەسىمىنە لايىق ازامات بولىپ الدارىندا قاسقايىپ تۇرعان ازاماتقا قۋاندى. اۆتور: «مەندە ءقازىر ءبارى جاقسى. ەشقاشان مويىماڭدار!» دەگەن كەزدە پاك كوڭىلدەر اقىنعا رازى بولدى. وقۋشىلاردىڭ اۆتورعا دەگەن ساۋالدارىن الداعى كەزدەسۋ كەزىندە قويىپ، ناقتى جاۋاپ الاتىنىنا دا سەنىمدىمىز.
«مىنا قويىلىم كورەرمەن-شاكىرتكە نەندەي وي سالدى؟» دەگەنگە كەلسەك، بۇگىنگى قوعامداعى ءماندى ماسەلەنىڭ بەتى اشىلعانى بايقالادى. جەتكىنشەكتەر جۇرەككە دەگەن مەيىرىمدى ءوزى عانا بەرە الاتىنىن ءبىلىپ، اينالاعا جىلۋلىقتى ءوزى توگە الاتىنىن تۇيسىنگەندەي. قويىلىمعا بارعان كورەرمەننىڭ ۇتقان تۇسى دا وسى. مۇنداي ادەبي-مادەني شارانى ۇيىمداستىرۋ ارقىلى ۇلتتىق ادەبيەتتىڭ ورتا بۋىن وكىلى مەن ونىڭ ءبىر تۋىندىسىنىڭ قانشاما وقىرمان جۇرەگىنە جول تابۋىنا سەبەپشى بولعاندايمىز»، – دەيدى اۋەزوۆ اۋدانىنداعى № 202 مەكتەپ-گيمنازيا ديرەكتورىنىڭ تاربيە ءىسى جونىندەگى ورىنباسارى ساپاركۇل لەسوۆا.