بۇگىن، 29 تامىز، ق ر پرەزيدەنتى قاسىم-جومارت توقايەۆتىڭ جارلىعىمەن جالپىۇلتتىق ازا تۇتۋ كۇنى دەپ جاريالاندى. قارالى كۇن ادام شىعىنى ورىن العان جامبىل وبلىسى بايزاق اۋدانىنداعى اسكەري قويماداعى جارىلىسقا بايلانىستى جاريالاندى.
ءبىز، «جەلتوقساندىقتار»، مەملەكەت باسشىسىنىڭ بۇل شەشىمىن دۇرىس دەپ قابىلدايمىز. «جەلتوقساندىقتار» - قارالى كۇندەردىڭ قانداي بولاتىنىن وسىدان 35 جىل بۇرىن ءوز باسىنان وتكىزگەن بۋىن. تەك ول كۇندەرى توتوليتارلىق جۇيەدە ەشكىم ءبىزدى قاھارماندار قاتارىنا قوسقان جوق ەدى.
ارينە، تاۋەلسىزدىكتىڭ 30 جىلدىعى قارساڭىندا، بەيبىت زاماندا وسىنداي توتەنشە جاعداي ورىن العانى وكىنىشتى. اسىرەسە، تاۋەلسىزدىكتى قورعايتىن، قامال بۇزاتىن جاستاردىڭ، مامانداردىڭ شەيىت بولعانى وكىنىشتى. كونستيتۋسيادا جازىلعانداي، قازاقستان رەسپۋبليكاسىنىڭ ءاربىر ازاماتى - ءبىزدىڭ باعا جەتپەس قۇندىلىعىمىز. تاۋەلسىزدىكتىڭ تۇعىرلى بولۋى ءۇشىن ءاربىر ازاماتىمىزدى كوزدىڭ قاراشىعىنداي ساقتاۋىمىز كەرەك. «ءار قازاق - مەنىڭ جالعىزىم» دەگەندەي، اتپالداي ازاماتتاردان ايىرىلعانىمىز وزەكتى ورتەيدى. ولاردىڭ ارتىندا تۋىستارى، وتباسى، ەلى قالدى. ءبىز ولاردىڭ ءوز مىندەتتەرىن اتقارۋداعى جانكەشتى ەرلىگىن، ازاماتتىقتارىن ەشقاشان ۇمىتپايمىز.
قازاعا ۇشىراعان ءار وتباسىنا، جالپى، قازاق ەلىنە بەس جۇزدەن استام مۇشەسى بار «جەلتوقسان اقيقاتى» رەسپۋبليكالىق قوعامدىق بىرلەستىگى اتىنان قايعىرىپ كوڭىل ايتامىن. بۇنداي قارالى كۇندەر قايتىپ كەلمەسىن! تاۋەلسىزدىك تۇعىرلى بولسىن!