«الاتاۋ» ىقشاماۋدانىندا ورنالاسقان يادرولىق فيزيكا عىلىمي-زەرتتەۋ ينستيتۋتىندا جالپىحالىقتىق رەفەرەندۋم قورىتىندىسى تالقىلاندى.
عىلىمي-زەرتتەۋ ينستيتۋتىنىڭ بىلىكتى ماماندارىمەن باس قوسقان الماتى قالالىق ءماسليحاتىنىڭ دەپۋتاتتارى، «بايتاق» پارتياسى مەن «امانات» پارتياسى مەدەۋ اۋداندىق فيليالىنىڭ جەتەكشى وكىلدەرى جالپىحالىقتىق رەفەرەندۋم قورىتىندىسىنا كوڭىلى تولاتىنىن بىلدىرە كەلە، ءبىر اي بويى وزدەرىمەن بىرگە ەلىمىزدىڭ ايماقتارىن ارالاپ، ءتۇسىندىرۋ جۇمىستارىن جۇرگىزۋدە بەلسەندىلىك تانىتقان ينستيتۋت ماماندارىنا العىسىن ايتتى.
«اتوم ەنەرگەتيكاسىنىڭ قاۋىپسىزدىگى – البەتتە، ەنەرگەتيكالىق قاۋىپسىزدىك. سول ارقىلى ەلىمىز ەنەرگەتيكالىق تاۋەلسىزدىككە ۇمتىلىپ وتىر. كەشەگى وتكەن رەفەرەندۋمعا قاتىستى ساۋالدار دا نەگىزىنەن وسى توڭىرەكتە، ياكي اەس-تىڭ قاۋىپسىزدىگى مەن ونى كىمدەردىڭ سالاتىنى، بۇل نىسانداردا كىمدەردىڭ جۇمىس ىستەيتىنى جونىندە وربىگەنى راس»، – دەدى ءوز سوزىندە جيىنعا قاتىسقان الماتى قالالىق ءماسليحاتىنىڭ دەپۋتاتى، «امانات» فراكسياسىنىڭ مۇشەسى جاندوس ءنادىروۆ.
باسقوسۋدا قاتىسقان ماماندار ەكولوگيالىق جانە ەكونوميكالىق اسپەكتىلەردى سارالادى. سونداي-اق، جەتەكشى ماماندار ءتىلشى قاۋىمعا ەلىمىزدىڭ ەنەرگەتيكالىق قاۋىپسىزدىگىن قامتاماسىز ەتۋدەگى اەس سالۋدىڭ ءرولىن كەڭىنەن ءتۇسىندىردى. گەوساياساتتاعى ءوز پوزيسيامىزدى جوعالتپاۋ جولىندا «وركەن جايۋىمىزدىڭ كۇرەتامىرى» سانالار ەنەرگەتيكا سالاسىن دامىتۋىمىز اسا قاجەتتىگىن ناقتى ايتتى. سوڭعى ەكى جىلدا ەل-جۇرتىمىز ساياسي ساۋاتتىلىعىن تانىتتى. سونىڭ ناتيجەسى رەفەرەندۋم قورىتىندىسىنان بايقالادى.
«جالپى، بۇل ساياسي ناۋقان – حالىق ۇنىنە قۇلاق اساتىن ۇكىمەتتىك پوزيسيانىڭ جارقىن كورىنىسى. دەمەك، حالقىمىز بولاشاقتا دامۋىمىزعا ىقپال ەتەتىن ستراتەگياعا داۋىس بەردى دەپ ويلايمىن. الىس-جاقىن شەتەلدەن كەلگەن ساراپشىلاردىڭ دا بۇل ساياسي ناۋقانعا بيىك باعا بەرۋىنىڭ ءبىر ءمانىسى وسىندا. بۇل بەلسەندىلىك ەلىمىزدىڭ دەموكراتيالىق جاعىنان دا ءوسۋىن دە كورسەتەدى. قوعامدىق دامۋدىڭ، سونىڭ ىشىندە سيفرلىق دامۋدىڭ ماڭىزدى بولىگى – ەنەرگەتيكا دەسەك، بۇل اتومدىق رەاكتورلار تولىقتاي ساندىق فورماتتا، اۆتوماتتاندىرىلعان جۇيەمەن جۇمىس ىستەيدى. وسى كەزگە دەيىن ەلىمىزدىڭ اۋماقتارىندا جۇمىس ىستەيتىن ءۇش وقۋ-جاتتىعۋ اتوم رەاكتورى بار. ءبىرى – الماتىدا، ەكەۋى – كۋرچاتوۆ قالاسىندا. ءبىز جۇمىس بارىسىندا تىعىز بايلانىستامىز. ماماندار جاعى جەتكىلىكتى، ءالى دە ىنتالى تۇلەكتەردى نەگىزگى ماماندىقتارعا ەلىمىزدىڭ ءۇش وڭىرىندەگى جوعارى وقۋ ورىندارى دايارلاۋدا، – دەيدى يادرولىق فيزيكا ينستيتۋتى باس ديرەكتورىنىڭ ءوندىرىس جونىندەگى ورىنباسارى، فيزيكا-ماتەماتيكا عىلىمدارىنىڭ كانديداتى ەۆگەنيي ەرماكوۆ.