بۇگىنگى تاڭدا الەمدىك وركەنيەت جاڭاشا باعىتتا دامىپ، كۇردەلى قۇبىلىستار ورىن الۋدا. جەر-جاھانداعى بەيبىتشىلىك پەن تىنىشتىققا نۇقسان كەلىپ، كەيبىر ايماقتاردا اۋىرجاعدايلار قالىپتاسۋدا. وسىنداي كۇردەلى وزگەرىستەر الەمدىك قاۋىمداستىقتىڭ ءبىر مۇشەسى بولىپ تابىلاتىن قازاقستانعا دا ءوز اسەرىن تيگىزەتىنى ءسوزسىز. الايدا قاشاندا باستى ۇستانىمى بەيبىتشىلىك پەن كەلىسىم بولىپ تابىلاتىن ەلىمىزدە مەملەكەتتىڭ دامۋى قالىپتى جاعدايدا وركەندەۋدە. الەمدىك ساياساتتا قازاقستاننىڭ بەدەلى جوعارى. مۇنىڭ بارلىعى ساليقالى ساياساتىڭ ارقاسىندا جۇزەگە اسۋدا.
سىرتقى ساياساتتا وسىنداي بەرىك ۇستانىم ۇستانعان ەلىمىزدىڭ ىشكى ساياساتىندا دا اسا ماڭىزدى ساياسي، ەكونوميكالىق بەتبۇرىستار جۇزەگە اسۋدا. ادىلەتتى قوعام قۇرىپ، جاڭا قازاقستاننىڭ ىرگەتاسىن قالىپتاسۋدا. ال 20 قاراشادا وتەتىن كەزەكتەن تىس پرەزيدەنتتىك سايلاۋ، جاڭا باسقارۋ ۇلگىسىن قالىپتاستىرىپ، بيلىكتىڭ جۇيەلى تۇردە اۋىسۋىن قامتاماسىز ەتەدى جانە قازاقستاننىڭ دەموكراتيالىق مەملەكەتكە اينالۋىنا جاسالعان ناقتى قادام بولماق. كونستيتۋسيالىق زاڭعا ەنگەن وزگەرىستەرگە وراي، ەندى پرەزيدەنت لاۋازىمى جەتى جىل مەرزىمگە ۇزارتىلىپ، ءبىر عانا مەرزىمگە سايلانباق.
بۇل الەمدىك تاجىربيەدەن الىنعان دەموكراتيالىق قادام. وسىنداي تىڭ وزگەرىستەر مەن جاڭاشىلدىق قوعامدا حالىق تاراپىنان قولداۋ تابۋدا. ءقازىر ەلىمىزدىڭ ءار ءوڭىردىڭ ەرەكشەلىگى ەسكەرىلىپ، ونىڭ دامۋ باعدارلامالارى ۇسىنىلۋدا.
ارينە ۇزاق ۋاقىتتا قوردالانعان ماسەلەلەر بىردەن شەشىمىن تابا قويماسى انىق، وعان ۋاقىت قاجەت. سول ءۇشىن بارلىعىمىز سايلاۋعا بارىپ، جۇيەلى جۇمىستىڭ جالعاسۋىنا سەنىم ءبىلدىرۋىمىز قاجەت. سەبەبى بۇگىنگى تاڭدا سىندارلى ساياسات ءوز ناتيجەلەرىن كورسەتۋدە. مىسالى ءال-فارابي اتىنداعى قازۇۋ العاش رەت QS ازيا ءوڭىرى جوعارى وقۋ ورىندارىنىڭ رەيتينگىنە ەنىپ، 44-ورىنعا يە بولدى. سونداي-اق، «QS Asia University Rankings 2023: ورتالىق ازيا» رەيتينگىندە 1ء-شى ورىن الىپ، ورتالىق ازياداعى ءبىرىنشى جوعارى وقۋ ورنى بولىپ تانىلدى. 2023 جىلعى شىعارىلىمدا ءال-فارابي اتىنداعى قازۇۋ QS Asia University Rankings رەيتينگىندە ۇزدىك 6% قاتارىنا ەندى. بۇل تەك ءبىر عانا وقۋ ورنىنىڭ عانا ەمەس، تۇتاستاي مەملەكەتتىڭ مارتەبەسى. ويتكەنى قازۇۋ «QS Asia University Rankings» رەيتينگىنە العاش رەت الەمدىك دەڭگەيدەگى سينگاپۋر ۇلتتىق ۋنيۆەرسيتەتى، پەكين ۋنيۆەرسيتەتى، توكيو ۋنيۆەرسيتەتى، مالاي ۋنيۆەرسيتەتى، كورەي ۋنيۆەرسيتەتتەر سەكىلدى وقۋ ورىندارىمەن بىرگە قاتىسىپ، ۇزدىكتەر قاتارىنان كورىندى. بۇل ارينە وتاندىق جوعارعى ءبىلىم سالاسى ۇشىندە ماڭىزدى قادام. وسىنداي جەتىستىكتەر، ءبىلىم ساپاسىنىڭ العا جىلجۋى، قوعام دامۋىنىڭ باستى كورسەتكىشتەرىنىڭ نەگىزى بولماق.
مۇنىڭ بارلىعى تاۋەلسىزدىكتىڭ ارقاسىندا قول جەتكىزگەن ەرەكشە جەتىستىكتەر. سوندىقتان ىرىس قونىپ، ب ا ق دارىعان بەرەكەلى ەلىمىزدەگى بىرلىك پەن ىنتىماقتى قادىرلەپ، يگىلىكتى ىستەردى قوعام بولىپ قولداۋىمىز قاجەت. ورتاق ماقسات، ەرتەڭگى بولاشاق ءۇشىن داۋىس بەرۋ ءبارىمىزدىڭ پارىزىمىز بولماق.