وسى جىلى ماگيستراتۋرا مەن رەزيدەنتۋراعا 385، دوكتورانتۋراعا 60 ستيپەنديا ءبولىندى.
ق ر ءبىلىم جانە عىلىم مينيسترلىگىنىڭ باسپا ءسوز قىزمەتىنىڭ مالىمەتىنشە، 23 مامىردا «بولاشاق» حالىقارالىق باعدارلاماسى بويىنشا جەتەكشى شەتەلدىك جوعارى وقۋ ورىندارىنا ءتۇسۋ ءۇشىن قۇجات قابىلداۋ باستالادى، دەپ حابارلايدى Almaty-akshamy.kz
كونكۋرستىق ىرىكتەۋ 2022 جىلعى 30 مامىر مەن 30 قاراشا ارالىعىندا وتەدى.
وتىنىشتەر 2022 جىلعى 14 قازانعا دەيىن Egov.kz مەملەكەتتىك قىزمەتتەر پورتالى ارقىلى قابىلدانادى. بيىل تاعىلىمدامادان وتۋگە قۇجاتتاردى قابىلداۋ 2022 جىلعى 5 قىركۇيەكتە باستالىپ، 14 قازانعا دەيىن جالعاسادى.
«مەملەكەت باسشىسىنىڭ تاپسىرماسىمەن «بولاشاق» باعدارلاماسىن قايتا باعدارلاۋ پروسەسى ىسكە قوسىلدى. ينجەنەرلىك-تەحنيكالىق كادرلاردى دايارلاۋعا باستى نازار اۋدارىلادى. وسىعان بايلانىستى «بولاشاق» باعدارلاماسى بويىنشا تەحنيكالىق جانە IT ماماندىقتارعا گرانتتار سانى 60 پايىزعا دەيىن ۇلعايتىلدى. بۇل «ينجەنەرلىك جۇيەلەر مەن جەلىلەر»، «اۆياسيا جانە اەروعارىشتىق تەحنيكا. اۋە قوزعالىسىن باسقارۋ»، «ۇلكەن دەرەكتەردى تالداۋ»، «جاڭا ماتەريالدار تەحنولوگياسى»، «دەرەكتەر بازاسىن باسقارۋ»، «اۆياسيالىق تەحنيكا جانە تەحنولوگيالار»، «ماشينا جاساۋ»، «ونەركاسىپتىك اۆتوماتتاندىرۋ» جانە ت.ب.»، - دەدى بعم حالىقارالىق باعدارلامالار ورتالىعىنىڭ باسقارما ءتوراعاسى ءانۋار جانعوزين.
جالپى بيىل «بولاشاق» باعدارلاماسى بويىنشا باسىم ماماندىقتار تىزىمىندە اكادەميالىق وقۋعا 92، تاعىلىمدامادان وتۋگە 158 ماماندىق قاراستىرىلعان.
ەڭبەك نارىعىنىڭ ۇردىستەرىن تالداۋ نەگىزىندە وسى جىلى تىزىلىمگە يننوۆاسيالار، جاڭا تەحنولوگيالار، مەديسينا جانە ونەركاسىپتىك ينجەنەريا، جاراتىلىستانۋ عىلىمدارى سالاسىنداعى 40 جاڭا ماماندىق ەنگىزىلدى. سونىمەن قاتار ولاردىڭ 17ء-سى اتاۋلارىن كەڭەيتۋ ارقىلى بۇرىننان بار ماماندىقتارعا ەندى. جالپى، باسىم ماماندىقتار ءتىزىمى تەحنيكالىق ماماندىقتارمەن 30%-كە كەڭەيتىلدى.
«بولاشاق» حالىقارالىق ستيپەندياسىنا كونكۋرستىق ىرىكتەۋ 3 كەزەڭنەن تۇرادى: كەشەندى تەستىلەۋ، تاۋەلسىز ساراپشىلىق كوميسسياسى مۇشەلەرىمەن جەكە اڭگىمەلەسۋ جانە شەتەلدە كادرلار دايارلاۋ جونىندەگى رەسپۋبليكالىق كوميسسيا وتىرىسىندا قۇجاتتاردى قاراۋ.