«بولاشاق» ستيپەندياسىنا قۇجات قابىلداۋ ءالى دە ءجۇرىپ جاتىر

قازاقستاندا ماگيستراتۋرا، دوكتورانتۋرا جانە رەزيدەنتۋرا باعدارلامالارى بويىنشا جەتەكشى شەتەلدىك جوو-لارعا ءتۇسۋ ءۇشىن قۇجات قابىلداۋ جالعاسۋدا.

وتىنىمدەر 14 قازانعا دەيىن Egov.kz مەملەكەتتىك قىزمەتتەر پورتالىندا قابىلدانادى. تاعىلىمدامادان ءوتۋ ءۇشىن قۇجات قابىلداۋ 5 قىركۇيەكتە باستالىپ، 14 قازانعا دەيىن جالعاسادى، دەپ حابارلايدى Almaty-akshamy.kz.

«بولاشاق» حالىقارالىق ستيپەندياسىن تاعايىنداۋعا كونكۋرستىق ىرىكتەۋ تولىعىمەن اۆتوماتتاندىرىلعان جانە ونلاين رەجيمدە وتەدى. ول 3 كەزەڭنەن تۇرادى: كەشەندى تەستىلەۋ، تاۋەلسىز ساراپشى كوميسسيا مۇشەلەرىمەن جەكە اڭگىمەلەسۋ جانە كادرلاردى شەتەلدە دايارلاۋ جونىندەگى رەسپۋبليكالىق كوميسسيا وتىرىسىندا قۇجاتتاردى قاراۋ.

ۇمىتكەرلەر كونكۋرستىق ىرىكتەۋگە قاتىسۋ ءۇشىن 2 نەگىزگى قۇجاتتى عانا ۇسىنۋى كەرەك - «بولاشاق» بويىنشا وقۋعا ۇسىنىلاتىن جوعارى وقۋ ورىندار تىزىمىندەگى شەتەلدىك ۋنيۆەرسيتەتتەن شاقىرۋ، سونداي-اق ناتيجەسى B1 دەڭگەيىنەن كەم ەمەس مەملەكەتتىك ءتىل بويىنشا ەمتيحان تاپسىرعانى تۋرالى سەرتيفيكات.

كونكۋرستىق ىرىكتەۋگە كەز كەلگەن قازاقستاندىق قاتىسا الادى، جاس شەكتەۋى جوق. ءوتىنىم تاپسىرعان كەزدە اكادەميالىق ءبىلىم الۋ جانە كەيىنگى ەڭبەكپەن وتەۋ مەرزىمى زەينەتكەرلىك جاستان اسپاۋى ءتيىس.

بيىل ماگيستراتۋرا مەن رەزيدەنتۋرادا وقۋ ءۇشىن 385 ستيپەنديا، دوكتورانتۋرا باعدارلاماسى بويىنشا 60 ستيپەنديا ءبولىندى.