Nobel Fest حالىقارالىق فەستيۆالىنىڭ اشىلۋ سەسسياسى اياسىندا قازاقستاندىق كاسىپكەر جانە مەسەنات يسلامبەك سالجانوۆ قازاقستاندى زاماناۋي الەمدە ايتارلىقتاي ىلگەرىلەتە الاتىن تەحنولوگيالار تۋرالى ايتتى، دەپ حابارلايدى Almaty-akshamy.kz.
بيزنەسمەن اتاپ وتكەندەي، ينتەرنەتتى بلوكچەين تەحنولوگيالار، جاساندى ينتەللەكت، كەڭەيتىلگەن جانە ۆيرتۋالدى شىندىق، Big Data، فينتەح، بيومەديسينا، كۆانتتىق كومپيۋتەرلەر، جاسىل ەنەرگيا الماستىرىپ وتىر.
«بۇگىندە قازاقستاننىڭ بىرەگەي تاريحي مۇمكىندىگى بار، ءبىز ودان ايىرىلىپ قالماۋىمىز كەرەك. بۇل – تەحنولوگيالىق ترانسفورماسيا كەزىندە عانا اشىلاتىن مۇمكىندىك. ءدال ءۇشىنشى ونەركاسىپتىك ريەۆوليۋسيا ازيا جولبارىستارىنا دامۋدا سەكىرىس جاساۋعا جانە الەمدەگى يننوۆاسيالىق كوشباسشى بولۋعا كومەكتەسكەن ەدى. ال بۇگىن قازاق بارىسىنىڭ تەحنولوگيالىق سەكىرىس جاساپ، قازاقستاندىق جاس عالىمدار مەن يننوۆاتورلاردىڭ تالانتتارى مەن قابىلەتتەرىن الەمگە كورسەتەتىن كەزى كەلدى. ءقازىر تەحنولوگيالىق ريەۆوليۋسيا ۋاقىتى، جاڭا تەحنولوگيالاردى جاساۋ ءۇشىن تەرەڭ تاريحي تاجىريبە قاجەت ەمەس، ويتكەنى بۇل تەحنولوگيالاردىڭ ءوزى الەم ءۇشىن جاڭا»، - دەدى يسلامبەك سالجانوۆ.
ول ءوزىنىڭ بايانداماسىندا، قازاقستاندى جوعارى تەحنولوگيالىق دامىعان ەلگە اينالدىرۋ – قازاقستان پرەزيدەنتىنىڭ ۇكىمەت الدىنا قويعان باسىم مىندەتتەرىنىڭ ءبىرى ەكەندىگىن اتادى. ونىڭ ايتۋىنشا، بۇگىنگى كۇنى قازاقستاندىق كاسىپكەرلەر وزدەرىنىڭ ستارتاپتارىن قۇرا وتىرىپ، يننوۆاسيالىق ونىمدەرىمەن جانە قىزمەتتەرىمەن الەمدىك نارىققا شىعىپ كەلەدى.
ءبىلىم، عىلىم جانە يننوۆاسيالاردى دامىتۋ بويىنشا نوبەل فەستيۆالىنىڭ ميسسياسىن وتاندىق جانە حالىقارالىق ۇيىمدار، ونىڭ ىشىندە فەستيۆالدىڭ باس سەرىكتەسى، قازاقستاننىڭ ەڭ ءىرى قوعامدىق قورلارىنىڭ ءبىرى «Altyn Qyran Foundation» قولداپ وتىر.