الماتىدا "انا ءتىلىمىزدى ارداقتايىق!" بايقاۋىنىڭ جەڭىمپازدارى سالتاناتتى تۇردە ماراپاتتالدى
حالىقارالىق «قازاق ءتىلى» قوعامىنىڭ الماتى قالاسى فيليالى مەن «قازاق گازەتتەرى» ءجشس-ى قۇرامىنداعى «انا ءتىلى» رەسپۋبليكالىق گازەتى وقىرماندار اراسىندا وتكىزگەن «انا ءتىلىمىزدى ارداقتايىق!» اتتى ۆيدەوروليك بايقاۋىنىڭ قورىتىندىسى شىقتى.
"قازاق گازەتتەرى" ج ش س الماتى قالاسى باسىلىمدارىنىڭ جەتەكىشىسى دۋمان اناشتىڭ ايتۋىنشا، بايقاۋدىڭ ماقساتى - وقىرماندى مەملەكەتتىك ءتىلدىڭ مارتەبەسىن كوتەرۋ جانە ناسيحاتتاۋدى جاڭا تەحنولوگيا مەن ترەندتەر ارقىلى جۇزەگە اسىرۋعا شاقىرۋ بولدى.
"انا ءتىلى" گازەتىنىڭ باس رەداكتورى ەرلان ءجۇنىس:
- بايقاۋعا 50 شاقتى جۇمىس كەلدى. ونىڭ ىشىندە بايقاۋ فورماتىن دۇرىس تۇسىنبەگەندىكتەن، جاراماي قالعان جۇمىستار دا بولدى. جاقسى روليكتەر دە بارشىلىق. قازىلار القاسى ولاردى ىرىكتەپ، ىشىنەن 3 جەڭىمپازدى انىقتادى. جامبىل، قىزىلوردا جانە ماڭعىستاۋ وبلىستارىنان كەلگەن ءۇش وقىرمانىمىز جەڭىمپاز اتاندى. ولار "انا تىلىنە" شىققان ماقالالار تۋرالى ساراپتامالىق ۆيدەوكونتەنت جاساپ، سول ارقىلى جەڭىسكە جەتتى.
حالىقارالىق “قازاق ءتىلى” قوعامى الماتى قالاسى فيليالىنىڭ ءتوراعاسى قۇسمان شالابايەۆ:
- قازاق تىلىنە، ۇلتقا، ۇلت بولاشاعىنا قىزمەت ەتۋ - بارشامىزدىڭ ورتاق پارىزىمىز. قازىرگى "مىلتىقسىز مايدان" زامانىندا ءتىل ماسەلەسى ماڭىزدى بولىپ تۇر. انا ءتىلى بارىمىزگە ورتاق، ءتىل وشسە، ۇلت وشەدى. سونى ۇمىتپاۋىمىز كەرەك. وسى ماقساتتا 1989 جىلدان بەرى "قازاق ءتىلى" قوعامىنىڭ ىستىق-سۋىعىنا ءتوزىپ جۇرگەن ازاماتتار جەتەرلىك. "انا ءتىلى" گازەتىنىڭ وقىرماندارى كوبەيسە، قازاق تىلىنە، ۇلتتىق سانا-سەزىمگە، يدەولوگياعا دەگەن كوزقاراس وياناتىن شىعار دەگەن ويمەن بايقاۋدى وتكىزدىك. گازەت، كىتاپ وقۋعا دەگەن قىزىعۋشىلىق باسەڭدەگەن زاماندا وقىرمان تارتۋ، وقۋعا دەگەن قىزىعۋشىلىقتى وياتۋ ءۇشىن جاسالىپ وتىرعان شارا جەمىسىن بەرەدى دەپ ويلايمىز.
بايقاۋدىڭ ۇزدىك ۇشتىگى:
ءى ورىن – قاسىمحان تولەندييەۆ - جامبىل وبلىسى،
iPhone 14؛
ءىى ورىن – ساعيرا ءۋالي - قىزىلوردا،
Apple Watch ساعاتى؛
ءىىى ورىن – رىسگۇل رامازانوۆا -ماڭعىستاۋ وبلىسى، Apple AirPods.
بايقاۋدىڭ ماراپاتتاۋ شاراسىنا قالي سارسەنباي، كاكەن قامزين، امالبەك تشانوۆ، قانسەيىت ابدەز ۇلى، ۇلىقپان سىدىقوۆ، ماماي احەتوۆ، بولات ءمۇرسالىم، ەرجان تولەك، 92-مەكتەپ ديرەكتورى كۇلجان شاجابايەۆا جانە باسقا قوعام قايراتكەرلەرى، باسپا ءسوز قىزمەتكەرلەرى مەن ستۋدەنتتەر قاتىستى.
جيىن بارىسىندا قالي سارسەنبايعا حالىقارالىق "قازاق ءتىلى" قوعامىنىڭ جوعارعى دارەجەلى “قازاق ءتىلى” وردەنى تابىستالدى. سونىمەن قاتار، "انا ءتىلى" گازەتىنىڭ ءتىلشىسى باعداگۇل بالاۋبايەۆا مەن "ەگەمەن قازاقستان" گازەتىنىڭ ءتىلشىسى ارمان وكتيابرگە قوعام اتىنان ارنايى ماراپاتتار تابىستالدى.
"قازاق گازەتتەرى" سەرىكتەستىگى قازىلار القاسىنىڭ مۇشەسى، پروفەسسور كاكەن قامزينگە قازاقى داستۇرمەن شاپان جاپتى.