ەلىمىز تاۋەلسىزدىككە قول جەتكىزىپ، دەربەس مەملەكەتكە اينالعانىمىزعا 33 جىل تولۋىنا وراي الماتىداعى 107 ليسەيدە «تاۋەلسىزدىك – تىرەگىم» اتتى مەرەكەلىك كەش ۇيىمداستىرىلدى.
ءىس-شاراعا ەلىمىزدىڭ تاۋەلسىزدىگى مەن ەلدىگىن جىرىنا ارقاۋ ەتىپ جۇرگەن ايتۋلى اقىن، حالىقارالىق «الاش» ادەبي سىيلىعىنىڭ لاۋرەاتى، س. مۇقانوۆ پەن ع. مۇسىرەپوۆ اتىنداعى مەملەكەتتىك ادەبي-مەموريالدىق مۋزەي كەشەنىنىڭ ديرەكتورى ءادىلعازى قايىربەكوۆ قۇرمەتتى قوناق رەتىندە شاقىرىلدى. مەرەكەلىك كەشكە ليسەي ديرەكتورى ءۇمىتحان اقاتان ۇلى، ونىڭ ورىنباسارلارى باقتىگۇل دوسىنبەكوۆا مەن عيبرات جاپباسبايەۆا باستاعان ۇجىم مۇشەلەرى، ۇستازدار مەن وقۋشىلار قاتىستى.
العاشقى ءسوز كەزەگى ءادىلعازى جاقسىلىقۇلىنا بەرىلدى. ول ەل تاۋەلسىزدىگى مەن جەلتوقسان وقيعاسى تۋرالى تەرەڭ وي قوزعاپ، سول كەزەڭدەگى ءوز ەستەلىكتەرىمەن ءبولىستى. اقىننىڭ «جەلتوقسان جاڭعىرىعى» پوەماسىنان ءۇزىندى وقىپ بەرۋى جينالعاندارعا ەرەكشە اسەر ەتتى. سونىمەن قاتار ول جەلتوقسان وقيعاسىنىڭ قاھارماندارىنىڭ ءبىرى، قازىرگى ءماجىلىس دەپۋتاتى نۇرتاي سابيليانوۆ تۋرالى جازعان كىتابىنان سىر شەرتتى. قاتىسۋشىلار اقىننىڭ ءار ءسوزىن ۇيىپ تىڭدادى.
كەش بارىسىندا تاريح ءپانىنىڭ ءمۇعالىمى ايگۇل جۇمابەكوۆانىڭ جەتەكشىلىگىمەن ليسەيدىڭ 8-سىنىپ وقۋشىلارى جەلتوقسان وقيعاسى مەن قاھارماندارى تۋرالى قويىلىم قويدى. شاكىرتتەردىڭ دايىندىق دەڭگەيى جوعارى بولدى، قويىلىم كورەرمەندەردى ەرەكشە اسەرگە بولەدى. جەلتوقسان وقيعاسىنىڭ درامالىق كورىنىستەرى جينالعانداردىڭ جۇرەگىن تولقىتىپ، جانىن تەبىرەنتتى.
سونىمەن قاتار، مەرەكەلىك كەش اياسىندا وقۋشىلاردىڭ «جاس ۇلان» ۇيىمىنا قابىلداۋ ءراسىمى ءوتتى. تالاپكەرلەر پاتريوتتىق سەزىممەن انت قابىلداپ، وتانىن سۇيۋگە، مەملەكەتتىك رامىزدەردى قۇرمەتتەۋگە، ۇلكەنگە قۇرمەت، كىشىگە ىزەت كورسەتۋگە سەرت بەردى. اقىن ءادىلعازى قايىربەكوۆ پەن ليسەي ديرەكتورى ءۇمىتحان اقاتان ۇلى «جاس ۇلانعا» قابىلدانعان وقۋشىلارعا توسبەلگى مەن گالستۋك تاعىپ، ولارعا اق جول تىلەدى.
كەش سوڭىندا ليسەي ديرەكتورى ءۇمىتحان اقاتان ۇلى قورىتىندى ءسوز سويلەپ، كورنەكتى اقىن ءادىلعازى قايىربەكوۆكە العىس ءبىلدىردى. اقىنعا يىعىنا شاپان جاۋىپ، شىعارماشىلىق تابىس تىلەدى. ءوز كەزەگىندە ءادىلعازى جاقسىلىق ۇلى دا ليسەي ۇجىمىنا ريزاشىلىعىن ءبىلدىرىپ، ءوزىنىڭ «جانداۋا» جىر جيناعىن سىيعا تارتتى.
مەرەكەلىك كەش ليسەي وقۋشىلارىنىڭ ونەر كورسەتۋلەرىمەن جالعاستى. كۇمبىرلەگەن كۇي، سىزىلعان ءان، شابىتتى جىر جينالعان قاۋىمدى رۋحتاندىرىپ، كەشتى ەرەكشە اسەرلى ەتتى.
بۇل كەش – تاۋەلسىزدىگىمىزدىڭ قىمبات ەكەنىن سەزىندىرەتىن، رۋحاني ازىق سىيلاعان مازمۇندى ءارى ماعىنالى شارا بولدى.