حالىقارالىق وليمپيادا جۇلدەگەرلەرى «بولاشاق» ستيپەندياسىن ەندى اۆتوماتتى تۇردە الادى.
عىلىم جانە جوعارى ءبىلىم ءمينيسترى ساياسات نۇربەك كەزەكتى بەرگەن سۇحباتتارىنىڭ بىرىندە «بولاشاق» باعدارلاماسىنا قاتىستى ءۇش نەگىزگى وزگەرىستى اتاپ ءوتتى، دەپ حابارلايدى Almaty-akshamy.kz Egemen.kz-كە سىلتەمە جاساپ.
ءبىرىنشى كەزەكتە، قازاقستان «بولاشاق» باعدارلاماسىمەن قايتادان باكالاۆر ماماندارىن دايىندايدى. «بولاشاق» باعدارلاماسىنان بۇل فۋنكسيا 12 جىل بۇرىن الىنىپ تاستالعان ەدى. ءقازىر تەك ماگيسترلەر دايىندالادى.
«ءقازىر «نازاربايەۆ مەكتەبىنىڭ تۇلەگى الەمنىڭ 26 جوعارى وقۋ ورنىنا ءتۇستى» نە «ءبىلىم-يننوۆاسيا مەكتەبىنىڭ تۇلەگى 17 وقۋ ورنىنان شاقىرۋ الدى» دەگەندەي جاڭالىقتاردى ءجيى ەستيمىز. الەمدە دارىندى بالالاردى تارتۋدا باسەكە باستالدى. ءبىزدىڭ مۇنداي تالانتتارىمىزدى شەتەل الىپ كەتىپ جاتىر. مۇنى بولدىرماس ءۇشىن حالىقارالىق وليمپيادا، سايىستاردىڭ جۇلدەلى ورىن يەلەرىنە «بولاشاق» ستيپەندياسىن اۆتوماتتى تۇردە بەرۋدى كوزدەپ وتىرمىز. السىن، وقىپ قايتسىن. ەسەسىنە، ولاردا ەلگە كەلىپ، العان ءبىلىمىن جۇمىسپەن وتەۋ جونىندە مىندەتتەمە بولادى»، - دەدى مينيستر.
ەكىنشى وزگەرىس – «بولاشاق» باعدارلاماسى جۇمىس بەرۋشىلەرمەن تىكەلەي ۇشتاستىرىلادى. جۇمىس بەرۋشى كومپانيا قاجەت كادرلاردى دايىنداۋعا تاپسىرىس بەرەدى، سايكەسىنشە كەيىن ولارعا جاۋاپكەرشىلىك تە جۇمىس بەرۋشىگە جۇكتەلەدى.
«بۇرىن باعدارلاماعا كەز كەلگەن ۇمىتكەر قاتىسا الاتىن بولسا، ەندى تاپسىرىستى كومپانيالار بەرەدى. ايتالىق، «قازاتومونەركاسىپ» يادرولىق ەنەرگەتيكا بويىنشا وزىنە قاجەت ماماندار ءتىزىمىن بەرەدى. ءبىز تاپسىرىستى قابىلداپ، ولاردى وقىتۋعا لايىق الەمدەگى ۇزدىك وقۋ ورىندارىن، زەرتحانالارىن تاۋىپ، وقىتامىز دا «قازاتومونەركاسىپكە» قايتارىپ بەرەمىز. سول ماماندارعا جاۋاپتى «قازاتومونەركاسىپ» بولادى»، - دەدى ساياسات نۇربەك.
ءۇشىنشى وزگەرىس – الداعى ۋاقىتتا جالپى گرانت سانىنىڭ 60 پايىزى تەحنيكالىق ماماندىقتارعا بەرىلەدى.
«مەديسينا، تەحنيكا جانە تاعى باسقا ەڭ قاجەت دەگەن سالالارعا مامان دايىنداۋعا ءمان بەرەمىز. بىزدە «بولاشاقپەن» ءبىلىم الىپ، ونىڭ الەۋەتىن دۇرىس پايدالانباي جۇرگەندەر نەگىزىنەن گۋمانيتارلىق سالا ماماندارى. ولاردىڭ سانى شەكتەلەدى»، - دەپ تۇيىندەدى ول.
سونداي-اق مينيستر ەندى گرانت سانى شەكتەلىپ، ساپاعا ءمان بەرىلەتىنىن اتاپ ءوتتى.